UXOSHELWE UKUNQABA UKWELULA INKONTILEKA
UXOSHELWE ukunqaba ukwelula inkontileka kuthongathi FC umdlali ozakhele udumo egijima kwiLamontville Golden Arrows.
ILANGA Langesonto lithole ngemithombo yalo ukuthi ligqashukile ifindo lomshado phakathi kukakhayalethu Mjoli nothongathi FC abedlala kulona esiswini.
Lo mdlali kuthiwa uxoshwe ngeledlule emuva kokuba enqabe ukwelula inkontileka kule kilabhu egijima kwinational First Division (NFD).
Uxoshwa nje, ubesephenduke insika kule kilabhu esiswini.
“Kuphelile ngomjoli notho- ngathi. Ngeledlule ubizelwe ehhovisi ukuba azokwelula inkontileka kodwa wanqaba.
Izikhulu zinqume ukumfaka amasondo,” kusho umthombo.
Leli phephandaba lishayela umjoli ngalolu daba, uvumile ukuthi uxoshiwe kodwa wangafuna ukwenaba ukuthi uxoshelweni.
Leli phephandaba lishayela usammy Troughton ongumqeqeshi wothongathi, ukuqinisekisile ukuthi lo mdlali uxoshiwe kodwa wangafuna ukwanda ngamaningi ezeseka ngokuthi uqhubeka nabasele. Leli phephandaba lithole ukuthi umjoli unqabe ukwelula inkontileka nje, yingoba kunekilabhu egiji- ma kwi-absa Premiership esimsayinise inkontileka yesibambiso.
Ngelizayo umjoli kulindeleke ukuba alibhekise kule kilabhu asesayine kuyona ukuze ajwayelane nozakwabo abasha.
Leli phephandaba lithole ukuthi isouth African Football Players Union (Safpu) isiqaphe ngeso lokhozi isimo salo mdlali ukuthi uthongathi luzomkhokhela yini umholo wakhe njengoba luthembisile.
Kuthiwa ngabaphathi bakhe abafake lolu daba kwisafpu ngenhloso yokubopha le kilabhu uma ike yaphula isivumelwano sokumkhokhela.