Kuqubuke indida kushona umdansi
UMNYANGO UYAYICHITHA EYEZIDAKAMIZWA
KUQHUME isililo ngomdansi okungaqondakali ukuthi ubulawe yini kodwa okunezinsolo zokuthi ushone ngemuva kokudliswa isidakamizwa esiyingozi esibizwa ngokuthi yiflakka. ISITHOMBE: SITHUNYELWE *Udabaekhasini3
SESIPHENDUKE insumansumane isigameko sokushona ngendlela engaqondakali komdansi, okusolwa ukuthi udle isidakamizwa esiyingozi iflakka, maqede waxinwa wukugula okunzima.
Ukungaqondakali kwembangela yokushona kuka-angel Namhla Zulu (26) wakwasanti, ngasepinetown, entshonalanga yetheku, obeyilungu leqembu lomdanso i-031 Movement, sekucasule nomndeni, ukhala ngokuthi awutholi izimpendulo eziqondile kusukela ekuguleni kukamufi. Ususola nokuthi kukhona okushaya amanzi.
Umufi kubikwa ukuthi ushonele esibhedlela i-addington, ethekwini, ngolwesithathu ngemumva kokungeniswa kuso ebusuku ngolwesine olwedlule.
Ngokuthola KWELANGA LangeSonto, indaba isuke ekilabhini ethekwini lapho bekunomcimbi WEMTV Base, wokwethulwa kohlelo lukamabonakude igqomnation.
Leli qembu lomdanso beliqashiwe, liyodansa kulo mcimbi.
Abebesondelene nomufi futhi abebekhona kulo mcimbi basola ukuthi ufakelwe lesi sidakamizwa esiphuzweni.
Bathi ngemuva kokuphuza leso siphuzo okusolakala ukuthi besinesidakamizwa, umufi uqale wagila izimanga, wavuka indlobane, epilingana elwa kodwa kungaqondakali ukuthi ungenwe yini.
Intatheli YELANGA Lange-sonto ebikhona kulo mcimbi ibonile umufi epilingana, onogada bezama ukumbamba kodwa kwanhlanga zimuka nomoya. Nokho onogada bagcine bekwazile ukumbamba, bamkhiphela emnyango. Ngemuva kwalokho kuthiwa uphuthunyiswe esibhedlela.
Ulandisa leli phephandaba umndeni uthi umufi ubephume ekhaya engumuntu obebukeka ephile saka - uvele wakhungatheka usutshelwa ngolwesihlanu olwedlule ntambama ukuthi ugula okokufa esibhedlela.
Unina ka-angel, unkz Rita Zulu uthi ngesikhathi efika esibhedlela okokuqala ufike isimo endodakazini yakhe sisibi kakhulu, ingasakwazi nakukhuluma, umqondo ungasebenzi kahle, udokotela wamtshela ukuthi (indodakazi) idle isidakamizwa.
“Udokotela ukuqinisekisile ukuthi idle isidakamizwa kodwa wathi usazohlola ukuthi hlobo luni lwesidakamizwa esidlile,” kuchaza unkz Zulu.
Ngemuva kwalokho uthi udokotela umtshele ukuthi bazomfonela uma ishona ukuze asayine amaphepha abanika igunya lokuhlola isidumbu. Isishonile indodakazi uthi ufonelwe yisibhedlela simcela ukuba aphuthume khona.
“Ngithe ngifika udokotela wangitshela ukuthi angisayine amaphepha okuthi isidumbu singahlolwa ngoba ingane yami ayibulawanga yizidakamizwa,” kuqhuba umama.
Uthi uzamile ukwenqaba ukusayina kodwa udokotela wamtshela ukuba asayine ngoba yena uyaphu- thuma, ujahe ukuhamba.
Ngesikhathi ekhuluma naleli phephandaba ubevutha, esola ukuthi kukhona okushaya amanzi, wathi bafuna izimpendulo.
Uwelly Gumede ongumphathi waleli qembu lomdanso, walile ukuphawula ngokwenzeke ngosuku lomcimbi.
Okhulumela umnyango wezeMpilo Kwazulu-natal unkz Ncumisa Mafunda uthe: “Umnyango udlulisa ukuzwelana nomndeni oshonelwe.
"Nakuba umthetho ungavumi ukuthi umnyango udalule isimo sempilo yesiguli noma imininingwane ngokwelashwa kwaso njengoba lokhu kuyimfihlo ephakathi kwaso noma umzali/umqaphi waso nabezempilo, kodwa umnyango ungakuqinisekisa ukuthi amarekhodi asesibhedlela ayaphikisana nokushiwo yiphephandaba mayelana nokusetshenziswa kwezidakamizwa.
"Emuva kokudlula emhlabeni kwesiguli esithile, abezempilo abasibonanga isidingo sokwenza i- post mortem. Kepha emva kokuba umnyango uthintwe yiphephandaba mayelana nalolu daba, isibhedlela sibe sesithintana nomama ngolwesihlanu ntambama (10 February) simazisa ukuthi uma enesifiso sokuba yenziwe i- post mortem kufanele kwenziwe amalungiselelo athile.
"Kodwa umama wesiguli ukucacisile ukuthi akasazimisele ngokuthi lokhu kwenziwe.”
Abe-viacom ephethe IMTV
Base bathunyelelwe imibuzo ngobhalonyazi
(email) kodwa kwashaya isikhathi sokushicilela ingakatholakali impendulo.