Kuhle ukubuza indlela kwabaphambili
UKUFUNDA kithina sizwe sama-afrika, kuyisiko. Yilokhu wonke umuntu akufundiswayo uma esakhula, ngoba kukholelwa ekutheni ukukhula okuyikho, kungukuba uncele ulwazi kubantu abadala nabangaphambili kwakho.
Lokhu kukunika ithuba lokufunda, ukhulise ulwazi onalo, futhi kukwenza wazi ukuthi yini ongayazi kahle, ukuze uzisimamise kukho, ngokuthekela ulwazi kwabanye abantu.
Ngisakhula ugogo wayehlala njalo engikhumbuza ukuthi lapha emhlabeni, akekho umuntu ophumelelayo uma enguzicabangele, engusiyazi futhi engaphikiswa.
Indlela ayekugcizelela ngayo lokhu wayekwenza ubone ukuthi ayikho nencane indlela yokuba uphumelele emhlabeni uma ungayidingi imibono yabanye abantu.
Wayengifundisa ukuthi ukukhula komuntu akuhambi ngeminyaka aseyiphilile kodwa kuhamba ngezinto asezifundile empilweni, okusho ukuthi awusoze waba yiqhawe ungakaze unqobe zimpi.
Lapho ayefike agcizelele khona kakhulu kwakungukuthi awusoze wakwazi ukunqoba izimpi zomhlaba ungazange ufundiswe ukuthi ziliwa kanjani, okungukuthi udinga ingqwele nokuyiyona ekufundisa izindlela ezibukhali zokugadla, kanjalo nezokuvika.
Mina njengoba ngakhulela emakhaya, kakade sasiba nesikhathi sokuyodla iphaphu, nokuyilapho sasifundiswa khona ukugadla nokuvika.
Sasithi sidla iphaphu kunjalo, kube kuchonywe ubhedu, lona-ke okwakuthiwa luyodliwa yilowo ogadle kwezwela kontanga yakhe, wakwazi ukuvika ukugadla ngendlela okuyiyona.
Ngaphezu kokudla ubhedu lowo onqobile, wayehlonishwa ngontanga yakhe futhi.
Yonke le ndaba engiyibalula ngenhla, isho ukubaluleka kokubuza kwabaphambili izinto ezimayelana nempilo jikelele.
Asisoze sakwazi ukunqoba emhlabeni uma singazange sakubona kubalulekile ukuba nezingqwele zethu, nokuyizona ezizosicija ngamasu okuvika, sibuye sigadle ngenkathi ontanga yethu besiphonsela inselelo.
Lo myalezo ubaluleke noma ngabe usukuliphi izinga lempilo, kwazise umuntu uyakhula imihla yonke.
Ukungakhuli komuntu elwazini, nasezintweni eziningi ezithinta impilo yakhe neyabanye abantu kufana ncamashi nokufa ngoba awusenaqhaza elitheni olibambayo ekukhuleni kwesizwe nomhlaba.
Isikhathi esikuso esilethwa wumshikashika wombango wombusazwe, wokuthi ngubani okufanele aphathe, wenza sonke sibe nombuzo othi kazi sesikhule kangakanani kuyo le ndaba yepolitiki, nokuthi sizihlupha kangakanani ukubuza kubaholi bomhlaba nezingwevu zethu ukuthi bona bayaye bazimise kanjani izimo ezifana nalezi.
Okuyikona okungisuse phansi ngathi ake ngiluthinte lolu daba, yingenxa yokubona lo mbango wombusazwe osezweni lakithi, okufanele ngabe usujwayelekile manje emuva kweminyaka engaphezulu kwengamashumi amabili sa-ngena kulesi sigaba sepolitiki evulekile nekhululekile, kodwa usabona abantu besilisa bekhahlela abantu besifazane njengoba si-bone kwenzeka ekomkhulu lenhla-ngano ebusayo egoli esontweni eledlule.
Ukumelana kwamaqembu amabili anemibono engafani, akusithusanga ngoba sikhululekile ukuzwakalisa imicabango nemibono yethu ngokwepolitiki.
Kodwa-ke ukuhluleka wukuhola, uze wehluleke nokuzilawula wena, utholakale uyindoda ukhahlela, ushaya uze ulimaze umuntu wesifazane ongalwi namuntu futhi ongenabungozi kuwe, kuwuphawu olusobala lokuthi uzifake kulento yepolitiki ungayazi.
Ngikuphonsela inselelo uma useyivukana kulo mkhakha ngoba uyingozi, buza kwabaphambi kwakho ukuthi isho ukuthini le nto okuthiwa yinkululeko yepolitiki ukuze ungazitholi usuphuma eceleni njengojosaka.