Utheneke amandla unozinti wechiefs
Indaba inokuqashwa komqeqeshi omusha
KUPUTSHUKA ukuthi utheneke amandla u-itumeleng Khune ( osesithombeni) ongukaputeni wekaizer Chiefs ngesinqumo sezikhulu zale kilabhu sokulanda umqeqeshi okuthiwa ukholwa wukuthi besingekho isidingo sakhe.
Ichiefs imemezele ngokusemthethweni phakathi nesonto ukuthi isiqashe ulee Baxter ukuzokuba ngumqeqeshi omusha wonozinti bale kilabhu.
Uqashwa nje, lesi sikhundla besibanjwe ngubrian Baloyi emuva kokuba kudlule emhlabeni u-alex Revoredo ngonyaka owedlule.
Ubaloyi kubikwa ukuthi naye ubesigaqele lesi sikhundla njengoba sekuqashwa ulee.
Ulee ushaya ibuya kwichiefs njengoba eke walandwa nguyise, ustuart phambilini kuyona ichiefs, ngaphambi kokuba badlulele kwisupersport United njengoba manje esecija ibafana Bafana.
Leli phephandaba lihletshelwe ngumthombo walo osondelene kakhulu nokhune ukuthi simqeda amandla isinqumo sechiefs sokulanda ulee ekubeni ubebona ubaloyi ewenza kahle umsebenzi.
“Ukhune ubesekhoneni likabaloyi, ubefuna unikwe yena ngokugcwele lo msebenzi. Ubengalindele ukuthi izikhulu zilande omunye umqeqeshi ekhona, simqede amandla isenzo sabaphathi.
Okumthena amandla kakhulu wukuthi uke wasebenza nolee phambili akabonanga simanga ebesingenza ukuthi anikwe lo msebenzi ukudlula ubaloyi,” kusho lo mthombo ocele ukuba lingadalulwa igama lawo.
Leli phephandaba lishayela uvina Maphosa wezokuxhumana kwichiefs ngenhloso yokufaka isicelo sokukhuluma nokhune ukuze aphawule ngalolu daba, walile ezeseka ngokuthi kabafuni aphazamiseke njengoba ikilabhu isekhempini ilungiselela umdlalo wayo necape Town City we-absa Premiership obuyizolo ngomgqibelo ebusuku EFNB Stadium, esoweto.