Itheku licacisa ngokuxhasa amametro
EZOMPHAKATHI: Bathi amasango abo asavulekile
ISIKHULU somnyango wezokuvakasha kumasipala wetheku, umnu Philip Sithole, sithi umasipala wetheku uvule izandla kubahleli bomcimbi okuthiwa ugqozelwa ngabaxhasi, amametro FM Music Awards.
Umnu Sithole usho lukhu ngemuva kokusabalala kwamahlebezi okuthi enye yezingqinamba ezidala ukuba lo mcimbi uhlehle ukuthi bonke abaxhasi bayaziqhelelanisa nawo.
Umnu Sithole uthi laba abakaze beze kumasipala bezofaka isicelo sokusebenza kodwa naye uzwa ngabantu nje bekhuluma.
“Inkontileka esasinayo nabo yaphela ngonyaka odlule unyaka ka-2017. Ngemuva kwalokho asikho esinye isicelo esike sasithola. Asinankinga namametro thina futhi sisazimisele ukusebenza nabo kodwa kumele bafake isicelo kuqala ngoba inkontileka yethu nabo yaphela ngonyaka odlule,” kuqhuba usithole.
Uthi akubona abangavimba lo mcimbi ukuba ungenzeki ngoba bona babekhokhela indawo owawenzelwa kuyona kuphela okuyinkosi Albert Luthuli International Convention Centre (ICC), imali uthi ibifakwa uhulumeni wakwazulu-natal.
Amahlebezi okuthi bahoxile ngenxa yenkohlakalo uwachithile wathi basazimisele ukusebenza nemetro FM. Imithombo YELANGA LangeSonto phambilini idalule ukuthi ukuhlehla kwalo mcimbi kudalwe wukuthi abaxhasi abafuni ukuzihlanganisa nawo ngenxa yenkohlakalo engaphakathi kuma Metro.
Umthombo uthe umsindo ngokuwina kwabaculi basemabala Noise kakhulu ngonyaka odlule iwona owenze abaxhasi babaleke.
Uphinde waveza nokuthi abanye abaculi basuke sebeyazi ingakaphumi imiphumela.
Kuzokhumbuleka ukuthi nge- sikhathi unasty C ewola izindondo kwabonakala isikhulu senkampani yakhe imabala Noise, umnu Reggie Nkabinde, siya phambili sikhombisa ukuqhosha ngabaculi baso.
Kuwo lowo mcimbi kwaba nesigameko lapho omunye wabaculi bale nkampani, uricky Rick, washiya angalazi egxeka indlela okujajwa ngayo kulo mcimbi.
Ngaphandle kwalezi zigameko baningi abaphuma kulo mcimbi bekhononda, benganelisekile bethi kukhona okudla amantshontsho emsamo ngendlela okujajwa ngayo okubalwa kubona nobabes Wodumo.
Ukaizer Kganyago, okhulumela ISABC, okuyinhlangano imetro FM esakaza ngaphansi kwayo uvumile ukuthi umcimbi usalokhu uhlehle njalo ngenxa yezinhlelo ezithize abasazihlanganisa.
“Amametro akusiwona umcimbi omncane, ngakho-ke ngeke sikwazi ukuwenza ngokucikizela. Kumele senze into engeke igxekwe abamaphepha kusasa,” kuqhuba ukaizer Kganyago.
Ukuqinisekisile ukuthi azokwenzeka wona ngasekupheleni kwalo nyaka kodwa wala waphetha ukudalula ukuthi azokwenziwa kuphi.
INKONTILEKA ESASINAYO NABO YAPHELA...