AMACIKO AZOKHOKHELWA WUMNYANGO NGQO
BENZE isivumelwano nomnyango wezobuciko namasiko KwazuluNatal ukunqanda izinkinga zokungakhokhelwa kwabaculi abahleli bomcimbi waminyaka yonke, Uvukile Gospel Festival kulo nyaka.
Umjosty Mbhele, ongomunye wabahleli balo mcimbi ozobe usuwenzeka okwesikhombisa kulo nyaka, utshele ILANGA Langesonto ukuthi kuphelile ukukhala kwabaculi njalo uma sekudlule lo mcimbi.
Kuzokhumbuleka ukuthi bese kuyinsakavukela umchilo wesidwaba ukuba abaculi bakhononde ngokungayitholi inkokhelo yabo uma sebedumise kulo mcimbi owenzeka ngempelasonto yephasika. Abaculi bebekhala ngabahleli ngokuthi bayehluleka wukufeza izethembiso uma sekudlule umcimbi.
Umjosty, obuye abe ngusomahlaya, uthi ukunqanda le nkinga kuphoqeleke ukuba benze isivumelwano nalo mnyango ukuze kube yiwona okhokhela ngqo abaculi.
“Sibe nomhlangano nomnyango sabanxusa ukuba bangabe besayinika thina imali yabaculi kodwa kube yibona ababakhokhelayo ukuze singathwali izinkinga zokungathembeki,” kuchaza umjosty.
Uthi bonke abaculi ababaqashile kulo nyaka babachazelile ukuthi bazokhokhelwa kanjani, nebala bavuma ngakho ngeke zibe khona izinkinga.
“Uma beba nezinkinga ngeke zisabhekana nathi kodwa kuzobe kuwumnyango othintekayo,” echaza.
Kulo nyaka njengoba lo mcimbi ugubha iminyaka eyisikhombisa umjosty udalule ukuthi uzoba sezingeni eliphezulu kakhulu kwazise ngokwenkolo, inombolo yesikhombisa isho ukuthi kuphelelisiwe.
Phakathi kwababoshelwe kubalwa udumi Mkokstad, Jumbo, Shongwe & Khuphuka, Andile Kamajola, Avante, Babo, Sgwili, Hlengiwe Mhlaba, Butho Vuthela, Frans Dlamini, Malusi Mbokazi, Abanqobi nethimba le-afrika nabanye abaningi.
Uthi kulo nyaka uthobekile uzonikezwa ihora lonke kanti bebengakahleli ukuthi kuzohlonishwa bani njengoba kuvamise ukwenzeka minyaka yonke.
“Sisazoba nomhlangano sihlele kodwa ngeke sibheke kubaculi kuphela kulowo esizomhlonipha. Sizobheka nakulabo ababambe iqhaza ekufukuleni umculo wowokholo,” kuphetha umjosty.
Lo mcimbi kulindeleke ukuba ube ngomhla ka-1 kundasa ( April) esport and Leisure, eport Shepstone, kanti amathikithi aseqalile ukutholakala.