KULINDWE ISINQUMO NGOMCIMBI UGU JAZZ
KULINDWE isinqumo sikamasipala Ugu ngokuqokwa kwenkampani ezohlela umcimbi waminyaka yonke osuzakhele igama, Ugu Jazz Festival.
Ngokuthola KWELANGA LangeSonto, iphelelwe yisikhathi inkampani icyassound Holdings, ebihlela lo mcimbi ozobe usuwenzeka okwe-11 kulo nyaka. Icyassound Holdings ephethwe ngumnu Siyabonga Msomi, ibisihlele lo mcimbi iminyaka eyisi-7.
Kulo nyaka kulindeleke ukuba kukhethwe inkampani ezohlela lo mcimbi odonsa abantu abaqhamuka ezindaweni ezahlukene emzansi nasemazweni angomakhelwane.
Umasipala usesikhi-phile isikhangiso sokuba izinka-mpani zingangenela kanti sekusele ukuba kuhlale isigungu esizoqoka inkampani.
Umnu Trevor Khanyile, okhulumela lo masipala, ukuqinisekisile ukuthi sekusezandleni zabo ukuqoka inkampani njengoba besikhiphile isikhangiso sethenda kanti nezinkampani ezizimisele zifakile izicelo.
“Sekusele ukuba kuhlale isi- gungu esizoqoka inkampani,” kusho umnu Khanyile enanela ngokuthi nenkampani ebiwuhlela lo mcimbi inalo ilungelo lukufaka isicelo.
“Lokhu akusho ukuthi sinenkinga nenkampani ebiwuhlela lo mcimbi, kodwa kuphele isikhathi sesivumelwano nokuwumgomo ukuba sikhiphe isikhangiso sethenda senze okufanele.
"Nayo ivumelekile ukufaka isicelo futhi uma isakufanele ukuqhubeka nomsebenzi ngeke ibe khona inkinga. Uma kunenye esibona iwufanele lo msebenzi, nayo singayiqoka,” kucacisa umnu Khanyile.
Umnu Msomi uthi naye ulinde umasipala uqoke inkampani kanti neyakhe isazimisele ukuqhubeka nokuhlela lo mcimbi.
“Kule minyaka eyisi-7 siwuhlela lo mcimbi, sikwenzile obekulindeleke kithina, kanti uma sinikwa elinye ithuba sizoqhubeka nokuwukhulisa njengoba besenza,” kusho umnu Msomi.
Ziningi nezinye izinkampani okuthiwa zizifakile izicelo zokuhlela lo mcimbi odonsa izinkumbi zabantu.
lucky.cain@ilanganews.co.za