Luseyimfihlo yesilo olokuqoqwa ko-r5
Isilo sinxusa amazulu ukukhokha le mali
LUSEYIMFIHLO yenkosi yesizwe samazulu, udaba lomnikelo wemali engama-r5 isilo ugoodwill Zwelithini kabhekuzulu, esiwucele ngesikhathi sivula isishayamthetho sesifundazwe saKwazulu-natal ngolwesibili.
Ongunobhala wesilo, umnu Nhlamvuziyashisa Sithole, ecelwa ukuba acacise ngalo mnikelo ukuthi ngowani, uthe kuseyimfihlo yembube okwamanje njengoba icacisile ukuthi isazokhipha imininingwane ngawo.
Nonyaka bekukhona nobengumengameli wezwe, umnu Jacob Zuma, onconywe kakhulu yisilo ngesinyathelo sakhe sokwehla esikhundleni. Sithe akwenzile bekungekhona ukuthi uyigwala, kepha wenze ubuqhawe wagwema isimo esibi esivamise ukwenzeka emazweni ase-afrika. Sithe wenze okufanele ukuba anike abanye ithuba lokuba nabo baveze amakhono abanawo.
Isilo sibe sesigcizelela ukuthi sona kasiyena umholi wendabuko, sazalwa siyinkosi. "Ngithi mangikucacise lokhu ukuthi mina ngiyinkosi yesizwe samazulu. Ukungibiza ngesilo, ingonyama nawo wonke la magama eningipha wona akusilo icala, vele umuntu uma umthanda uyamthakazela kepha mina ngiyinkosi,” kusho ongangezwe lakhe.
Ngaphambi kokuba isilo sicele lo mnikelo, siqale sendlalela ngokukhumbuza amalungu esishayamthetho ukuthi udaba lomhlaba wengonyama, obizwa Ingonyama Trust, lwake lwakhulunywa enkantolo kwavunyelwana ngokuthi umhlaba ungowaso.
Sithe sesiwubonile umqulu wezincomo zekhomishana ebiholwa ngowayengumengameli, umnu Kgalema Motlanthe, othi ayihlakazwe.
"Ngimangele ukuthi kuleyo Khomishana akaphathwa uhulumeni wakwazulu kepha kuthiwa bekubuthene osomlomo bamaphalamende, angazi noma owethu wayekhona yini lapho.
"Ngonyaka we-1996 yaphasiswa indaba yengonyama Trust ngowayeyinhloko yamajaji ngaleso sikhathi. Ngithi angiyisukumele le ndaba silungise izinto ngisaphila ukuze isizukulwane sethu singasithuki. Thina Zulu sifisa ukulungisa izinto ngokuthula ngoba safunda isifundo ngempi yasesandlwana. Akekho owazuza ngoba kwalahleka imiphefumulo yabantu,” kubeka imbube.
Isilo siqhubeke sathi: "Ngizothumela abakhongi ngalolu daba lomhlaba, kuzoba ngamajaji asathatha umhlalaphansi, abameli nezazimthetho zisicebise, zikhu- lume nosopolitiki bonke. Ngizokwenza isiqiniseko sokuthi bonke abakhele ingonyama Trust bayazi ukuthi kwenzekani ngezindawo zabo.
"Ngimema izinduna zonke zifike namakhosi azo ngenyanga ezayo ngizocela ungqongqoshe wezoMdabu nokubusa ngokubambisana, unkk Nomusa DubeNcube ukuba anginikeze wonke amagama azo ukuze kucace ukuthi engafikanga yona iholelwa ngubani.
"Ngizovula amakhawunti kuwo wonke amabhange amakhulu kuleli ngicela wonke amazulu akhiphe u-r5 nje kuphela.
"Ngifuna ukuthi ngisho ohlala phesheya ongumzulu asho athi isinyathela awabantwana. Ngizoyikhipha imininingwane yasemabhange khona maduze nje. Isiqubulo sami sithi: “Vuka Zulu!” "Ngifuna kuphele ngalolu daba ngalo nyaka wezi-2018,” kusho isilo.
Sinxuse ukuba anikwe inhlonipho emfanele umntwana wakwaphindangene, inkosi Mangosuthu Buthelezi ngeqhaza lakhe lokuba ngumbele ogwansile oncelisa isizwe.
Ingonyama ibuye yathi kayiyizwa kahle indaba yamakhomishana ngisho lawa axazulula izinkinga zokubulawa kwabantu ngoba kuchithwa imali enkulu kuphenywa kuziwe nezincomo kepha azikuqedi ukubulalana kwabantu.
Umnu Sihle Zikalala, onguNgqongqoshe wezokuthuthukiswa komnotho Kwazulu-natal, ubonge inkulumo yesilo wethembisa ukuthi izicelo ezibekwe yiso uhulumeni wakwazulu uzohlangabezana nazo ngenhlonipho.
Isilo sikazulu, ubhejane ephuma esiqiwini ungalonde kagabela, sivale inkulumo yaso ngevesi Abasethesalonika bokuqala isahluko 13 vesi 41.
Sigcizelele ukuthi sona kasiyena umholi kodwa sazalwa siyinkosi.