BAZOQOPHA NDAWONYE ABEBEYIZITHA KUMASKANDI
KUSHAQISE abaningi endimeni yomculo wesintu ukuhlangana kwabaculi ababili bakamasikandi obekwaziwa ukuthi abancindi odengezini olulodwa.
Sekuvele ezithi bazosebenzisana kwi-albhamu yomunye wabo ezophuma phakathi nenyanga undasa(march) nonyaka.
Ubukelani “Dlubheke” Khuzwayo upike umthandeni “igcokama Elisha” Manqele kwialbhamu yeqembu Amanguni Amahle okungelinye lamaqembu kadlubheke.
Kuzokhumbuleka ukuthi lezi zinsizwa bezingabhekani njengoba zike zaphonselana amaganyana anohlevane ezingomeni zazo.
Ungalabesi Hlomuka wenkampani ukhozi Media okuqopha kuyo udlubheke futhi evundulule umthandeni ngesikhathi engena kwezomculo, uthi naye uthuke kakhulu emcimbini wempucuzeko Festival obusethekwini nyakenye ngesikhathi udlubheke ethi akamuphelezele (ungalabesi) ngoba ufuna ukuyobingelela igcokama Elisha.
“Nami bengithi kunempi enkulu phakathi kwabo kodwa udlubheke wakubeka kwacaca kimina ukuthi bayafonelana negcokama Elisha ayikho inkinga,” kusho ungalabesi. Uthi kuyinto enhle ukuhlangana kwalaba baculi.
Ngakolunye uhlangothi udlubheke ukuvezile ukuthi sebeke bahlala phansi izikhathi eziningi bayixoxa eyokungahoshelani kwabo.
“Umthandeni akakhulumi ukungcola futhi uyinsizwa. Uneqiniso futhi angisho ngoba ngincenge abalandeli bakhe,” kusho udlubheke.
Ngonyaka wezi-2013 kwi-albhamu yegcokama Elisha esihloko sithi “Sibiza Abadlwane”, kunezinhlamvu ebezizwakala sengathi zibheke kudlubheke ngokusho kwabalandeli bakamaskandi kanti ne-albhamu kadlubheke ayikhiphe eminyakeni edlule esihloko sithi “Badleni Laba?” bekukhalwa ngesifanayo.
Imizamo yokuxhumana negcokama Elisha kayiphumelelanga kanti ingoma abayenzile kule albhamu ithi “umlabalaba”.