Imicabango yakho iyona eyokwahlulela
UKUKHULUMA iqiniso ngayo yonke imihla yokuphila kwethu, kungumgomo uthixo asibekele wona futhi esingadingi ukukhunjuzwa ngawo imihla namalanga.
Yiwona mgomo awumisile umvelinqangi ekuphileni kwethu, futhi siyobe sikhululeke ngempela uma nje singahlala kuwo.
Kulesi sikhathi esiphila kusona, lapho abantu sebasaba kangaka ukukhuluma nokumela iqiniso, kuyadinga sikhumbuzane ukuthi umhlaba uyosahlulela ngesikhethe ukukwenza, okubalwa ukubalekela nokwesaba ukukhuluma iqiniso.
Namhlanje ngithe ake ngikhulume ngaleli qiniso, kuye ngokuthi uzolithatha linjengoba linjalo, noma uzokhetha ukuphikisana nalo.
Sekuvezwe kaningi ukuthi yonke into ekhona emhlabeni ingumphumela wemicabango yethu.
Basembulela into emangalisayo abantu abanolwazi ngale mfihlo.
Izingcithabuchopho, ziyibiza nge-law of attraction kanti asebake bafunda incwadi ebhalwe ngurhonda Byrne ethi: The Secret, bazoyikhumbula le ndaba engikhuluma ngayo.
Bayibiza nge-law of Attraction nje, yingenxa yokuthi bayichaza ngokuthi impilo ikunikeza lokhu oyinika khona nawe.
Lokhu kusifundisa ukuthi uma uwuhlobo lomuntu onamagqubu, ongathetheleli, onenhliziyo embi, imizindlo emibi, ongeneliswa yilutho, ohlale njalo ekhononda, egcwele inzondo nobubi emqondweni wakhe, nakanjani, umhlaba uzokubuyisela kuwe konke lokho kunjengoba kunjalo.
Ngisho ungazama mizamo yini yokwenza umehluko empilweni yakho, iqiniso liwukuthi phela awukwazi ukutshala amazambane, bese kumila ubhontshisi.
Kungabe isimanga leso. Ngiqinisekile nawe nje ungake uye emhlahlweni uyofuna ukuzwa ukuthi konakelephi, nakhu kumila ongazange ukutshale.
Yonke into eyenzeka empilweni yakho ingumphumela wemicabango yakho.
Uma ungumuntu oqotho, onenhliziyo enhle, ononembeza ophilayo, onokuzethemba ngaphandle kokuzigqaja, onomusa kwabanye abantu, onothando, onesihe, okhathalela abanye abantu, okholelwa ukuthi nabo, njengaye, bangcono futhi bangenza mhlampe kangcono kunaye, ngale kokuzibukela phansi yena, kodwa ngokwazi ukuthi phela sidalwe ngezindlela ezahlukene sonke, noma kanjani umhlaba uzobuyisela kuwe konke lokhu engikubalile kunjengoba kunjalo nangaphezulu.
Lokhu kungifundise ukuthi ngisiqaphele isimo somqondo wami, ngoba sengiyazi ukuthi sihamba ibanga elide kakhulu ukuveza ukuthi ngizoba hlobo luni lomuntu kusasa.
Ugogo wayethi sisakhula, ukuziphatha kahle ukuzidumisa, kanjalo nokuziphatha kabi ukuzidumisa, sekungaba kuwena ukuthi ufuna ukuduma ngakuphi.
Lawo mazwi abesenza sikhule sibesaba abantu, silisaba nehlazo, ngoba sasikhumbula lawa mazwi kagogo ayesikhulisa ngawo.
Namhlanje ngiye ngizwe abantu nami bengibiza ngesithakazelo sami, okuwuphawu lwenhlonipho olusezingeni eliphezulu lapha kwelikamthaniya, okusuke kuvuna ukuthi nami ngikholelwa kakhulu ekubizeni umuntu ngesithakazelo sesibongo sakhe.
Kusho ukuthi ngingufakazi oqanda ikhanda kule mfihlo okukhulunywa ngayo.
Abantu bakunika lokhu obanika khona, nempilo ikunika lokhu ozindla ngakho imihla ngemihla.
Iseluleko sami kuwena, ukuthi uyiqaphele ngaso sonke isikhathi imicabango yakho, ngoba iyona ezala amazwi owaphimisela ngomlomo wakho, kanti iwona amazwi akho akuholela ezenzweni zakho, njengoba izenzo zakho kuyizona ezikumele emhlabeni, futhi neziyikho konke thina esingakwazi ngawe.