Ukuthobelana nobumbano makube phambili emakholweni
“AMANDLA ebandla likakrestu elihlangene futhi elinokuthobelana.”
Lena kube yingqikithi yentshumayelo eyethulwe ngumfundisi Maswempi Dlamini webandla i-apostolic Faith Mission, egamalakhe, ogwini oluseningizimu yekwazulu-natal ngeledlule.
Umfu Dlamini ubeshumayela ngesingisi, etolikelwa ngunkz Samkelisiwe Bele. Uthe lokhu ukwenzela ukuba azijwayeze lolu limi ngoba ubizelwe ukushumayela ezizweni ezingaluzwa ulimi lwesizulu emazweni angomakhelwane.
Ufunde encwadini ye-zenzo 13, ivesi lokuqala kuya kwelesine, lapho kufundeka khona kanje: “E-antiyokiya kwakukhona abaphrofethi nabefundisi ebandleni lakhona, ubarnaba kanye nosi- meyoni owayebizwa ngokuthi ngunigeri, nolukiyu wasekhurene, nomanayeni owayondliwe kanye noherode umtetrarki,* nosawulu.
Bathi bekhonza inkosi, bezila, umoya ongcwele wathi: 'Ngihlukaniseleni ubarnaba nosawulu ukuba baye emsebenzini engibabizele wona.'
“Khona bazila ukudla bakhuleka, babeka izandla phezu kwabo, babamukisa. Bona-ke bethunyiwe ngumoya ongcwele behlela eselukiya, basuka lapho baya ekhupro ngomkhumbi.”
Uqhubeke washumayela wathi: “I-antiyokiya yidolobha lamagriki eliphambili, abaphrofethi nabefundisi bahlangana lapha beqhamuka emazweni ehlukene bethunywe ngumoya ongcwele bengazani. Kukhona ngisho ababevela ezwenikazi lase-afrika njengoba uzwa kukhona ababizwa ngabasenigeri.
"Kungenzeka nokuthi ngaleso sikhathi babebhince ngisho amabheshu kepha ngenxa yokuthi babehlanganiswe ngumoya ongcwele, bonke bezokwenza umsebenzi kankulunkulu akekho owabe ebukela omunye phansi.
"Baba nomoya wokuthobelana phezu kokuba abanye babo babesezingeni eliphakeme.”
“Uma abantu behlangene endlini kankulunkulu kumele babe moya munye, akukhathalekile ukuthi baqhamuka emindenini enjani.
"Akusho lutho ukuthi banengcebo engakanani - abantu mabafunde ukuzithoba.
"Mina ngilapha ukuzoletha izwi likankulunkulu, ngiyisithunywa, angimkhulu kunani.
"Sekwaba khona ukuncintisana emabandleni, abanye baze bancintisane ngisho nabefundisi babo imbala, ufice nabefundisi sebezama ukuzivikela ukuze bakhombise ukuthi bona bangcono kunamalungu ebandla,” kubeka umfu Dlamini.
Uqhubeke wathi, uma abantu bekhonza inkosi ngeqiniso mayehle impakamo. Uthi kukhona abafika sekudlule isikhathi enkonzweni ngoba bebona ukuthi kuwukuzehlisa ukufika kuqala. Uze wathi kukhona abangeke bangenise abantu emnyango ngoba bebona ukuthi kuwukuzehlisa lokho.
“Ngisho uma uyosika umswenko wakho esitolo wuthenge ngoba ufuna ukuwembatha ufihle umzimba, ungawukhethi ngoba uthi ufuna ukuhlabekisa osibanibani (ngoba) sekuyimpakamo leyo.
"Besingobani-ke thina, ujesu wehla ezulwini ezofela thina. Wazehlisa wanikela ngempilo yakhe. Wayenothando, esithanda. Usuke ungakabi ngumzalwane ophelele uma ungenalo uthando lwabazalwane bakho. Thanda wonke umuntu,” kuphetha umfu Dlamini.
Okuhlabe umxhwele kule nkonzo wukuthi bekuculwa amaculo aqanjwe nguye ngqo umfu Dlamini. Bekuthi nalawo asemasha, abangakawajwayeli abafundise bagcine sebewacula abazalwane.
Siyakukhuthaza lokhu okwenziwa ngumfu Dlamini ukuqanjwa kwamaculo esonto ngoba bonke abazalwane banalo ilungelo lokuqamba, kungabe lokhu kwaculwa lawo aqanjwa emandulo.