1. UMA NISETAFULENI
EZINYE izinto ebudlelwaneni bothando zidinga usebenzise ingqondo, ukwazi ukuhlukanisa into efanele nengafanele.
Mubi umuntu othi ehleli nesithandwa sakhe kodwa elokhu egqolozelene nomakhalekhukhwini, ecofa into engapheli.
Lowo mkhuba ungakwenza ubukeke njengomuntu ongakuthokozeli ukuchitha isikhathi nodali wakho. Akushiwo ukuthi umuntu angabe esawusebenzisa nhlobo umakhalekhukhwini wakhe. Kodwa kufanele sikuqonde ukuthi kunezikhathi lapho kudingeka nibe nesikhathi senu nje nobabili, ningaphazanyiswa yilutho.
Nizixoxe ngothando lwenu, nikhulume into engathi shu, niwotawotane, nihleke kube mnandi kube njeya.
Ngesinye isikhathi kuye kusuke ingxabano eshubile phakathi kwabantu abathandanayo, isuswe nje yinto ebingagwemeka.
Kunezinto okufanele siziqaphele ngomakhalekhukhwini ezingasusa impi, nigcine senilwa nize nicishe nikhiphathe amehlo. Nakuba ziningi kakhulu izinto eziphawulekayo, ezingasusa umsindo kodwa sizokha phezulu nje, sibheke ezimbalwa.
Okokuqala nje kukhombisa ubuqaba ukulokhu utobozana nefoni into engapheli nibe nisetafuleni - akukhathalekile noma nidla isidlo sasekuseni, esasemini noma esasebusuku. Akuhambisani nje futhi nemithetho yokuziphatha yasetafuleni.
Asisho-ke ukuthi ngeke usalubamba ucingo - ungalubamba uma kuyinto esemqoka ngempela, kodwa khumbula phela ukucela uxolo.