SIVULA AMEHLO ABACULI: KNOWLEDGE SIMELANE
SIKHUZA abanikazi bezitudyo abangawuhloniphi umsebenzi wabo nabangazihloniphi kwabona. Umculo kawuthathwa noma yikanjani. Njengoba sekunenqwaba yonjiniyela abavele baqophe umculo emakamelweni, buningi ubuhlathi obuba khona okumele sibukhuze kungaze konakale kakhulu.
Umnikazi wesitudyo noma ngabe sisemjondolo kuhle ayazi injongo yokuba naso. Sesibone abaningi abenza lezi zinto ezilandelayo:
Benza izitudyo zabo izindawo zokuzitika ngotshwala noma izidakamizwa.
Kukhona abazenza izindawo zokugila imikhuba. Abanye baqopha abaculi kunemisindo ngaphandle kuvulwe iminyango.
Abasigcini isikhathi okusuke kuvunyelwane ngaso.
Kuthi kuqoshwa bebe belibele wukuleva izindaba.
Abakwazi ukulawula izivakashi zabo uma bematasa beqopha, bancamela ukumisa umsebenzi banake izihlobo. Ukuzimela akusho ukuthi unjiniyela ( sound engineer) akaziphathise okwesilwane enze noma yikanjani ngoba lowo osuke emqashile usuke ekhokhile futhi ebeke ithemba lakhe kuyena. Kuyacasula ukungahlonishwa komuntu olethe umsebenzi bese unjiniyela emncikisela ngokuthi uzovele awuyeke umsebenzi wakhe.
Okunye okuyinkinga kulabo njiniyela abangalazi ibhizinisi, bayawunyanyalata umsebenzi womuntu ngoba bejahe ukuthola imali, bakhohlwe wukuthi bayazibulala ngokwenze njalo ngoba uma umsebenzi usuphumile, abawulalele baye bafune ukwazi ukuthi wenziwe ngubani. Uma eshaye udaka, liyalimala igama lakh, kanti uma eshaye into ecokeme, liyaphakama. Abehlise izinga lophuzo oludakayo onjiniyela nodj nabaculi. Kumele bazi ukuthi umsebenzi wumsebenzi ngoba ngesikhathi besebenza sebeshayile, kuningi okonakalayo bengezwa, belibele wukuzincoma befudunyezwe ngamahabulo.
Okubi kakhulu yinkani abanayo abanye abangezwani nokwelulekwa bezibona sebengobasi. Mabayiqaphele futhi abanikazi bezitudyo indaba yokudla imali bume uma bekhokhelwa. Imvamisa bavele bayibhubhudle bangayibeki ngoba elokufa alitsheli, kusemnandi kunjalo ungezwa ukuthi uvuke ekuseni esethule kube nzima ezihlotsheni zakhe engasangcwabeki. Phela lokho kuholela ekubeni ziqale izinkulumo zokuthi kwadliwa izimali zakhe ekubeni kunguyena owayeziququda nezimpintshi zakhe.
ODJ, abaculi, onjiniyela nabo bonke abakule ndima yomculo, kuhle bakubeke emqondweni ukuthi banabangani abaningi kangaka nje, yingoba bezodla imali. Uma engasenamali bahlehla bonke. Mawuhlonishwe umsebenzi bakwethu.