NGAPHANDLE KWENKUNDLA:
UZIFAKE emabhukwini omlando ujenet Mbhele ngokuba ngumsubathi wokuqala omnyama wesifazane wakwazulu-natal okuzokuthi mhla zingama-24 kundasa (March) amele iningizimu Afrika kwi-international Association of Athletics (IAAF) World Half Marathon espain.
Ujenet uzalelwe emvubukazi, emzimkhulu mhla ziyisi-6 kumfumfu (October) ezalwa ngunokubonga Dlamini kanti ubaba wakhe akasekho emhlabeni.
Yize ezalelwe emvubukazi kodwa isikhathi esiningi usichithe enew City khona emzimkhulu.
Bayisi-9 kwabo. Kukhona uphakamani, ukhanyisile, umcheluzi, usphamandla, usfiso, ulucky, ugabisile, u-akhona bese kuba nguye ongumagcino.
Uqale imfundo yamabanga aphansi ewalter Sisulu Primary School wabe esedlulela ewebbstown High School lapho ephothule khona u-grade 12 ngowezi-2013 kanti manje wenza unyaka wokuqala kwiplumbing eberea Technical College, ethekwini.
Ungene kulo mdlalo sakudlala ngowezi-2012.
Ngesikhathi esincane eqalile ukugijima impilo yakhe ishintshe kakhulu njengoba ubesekwazi ukuhlala enemali yokudla esikoleni njengoba ubejwayele ukuthola imali emijahweni ayingxenye yayo, ngemuva kwalokho akabange esabheka emuva.
Useke wamela ikwazulu-natal amahlandla amaningi emidlalweni enhlobonhlobo okuhlanganisa i-track and Field, Cross Country neroad Running.
Ukwenza kahle kwakhe kwezokugijima kuholele ekutheni aqokelwe esikwatini sikazwelonke sesouthern Region ngowezi-2016 enamibia nasemadagascar nyakenye.
Izikhathi zikajenet ezikwi-iaaf zimi kanje, u-16:38:78 kwi-5 000m, u-35:20:49 kwi-10 000m, u-35:01 kwi10km no-1:15:06 kwihalf Marathon.
Lo msubathi uthi akangabazi ukuthi uzokwenza kahle espain. Uthi okumphula umoya wukuthi yize eqale ukuzihlanganisa nezokugijima ngowezi-2012 enza kahle kodwa bayagqoza abaxhasi.
Namuhla ngesonto umasipala iharry Gwala ufisele lo msubathi uhambo oluhle waphiwa nemali engadalulwanga.
Ingxoxo YELANGA Langesonto nojenet ngempilo yakhe yangaphandle kwenkundla ihambe kanje:
ILANGA Langesonto ( IL): Ungumuntu onjani?
Jenet: Ngiwumuntu ozithobile nokhonze ukuhlala ehleka kanti nomama wami unokubonga usho njalo.
IL: Ukhule kanjani?
Jenet: Ngikhulele emndenini omningi, kodwa umama ukuqinisekisile ukuthi siyaphila asisokoli.
IL: Usichitha kanjani isikhathi sakho?
Jenet: Ngikhonze ukulalela umculo.
IL: Yiluphi uhlobo lo mculo olukushaya ngaphakathi?
Jenet: Ngiyazifela ngowokholo. Umculi engimthandayo ngulusanda kanti ingoma yakhe engiyizwa ngaphakathi ngethi: “Ujesu uyangibona”.
IL: Uyakholelwa emuthini?
Jenet: Ngiwumntwana kankulunkulu kodwa umuthi kangiwexwayi.
IL: Yiliphi ivesi olikhonzile ebhayibhelini?
Jenet: Amahubo 23 lapho kunevesi elithi ujehova ungumalusi wami noma ngihamba esigodini sethunzi lokufa kangiyokwesaba. Lingenza ngilangazelele usuku olusha ngaso sonke isikhathi ngoba ngiyazi ukuthi unkulunkulu ungumalusi wami.
IL: Unaye umuntu ohlekisana naye?
Jenet: Kangikabi naye futhi nengane kanginayo. IL: Uthanda hloboluni lokudla?
Jenet: Ngithanda irice nenyama yenkukhu. Nepizza ngiyikhonzile.
IL: Ukhonze umbala onjani?
Jenet: Ophuzi.
IL: Emidlalweni ewuchungechunge yakuleli yimuphi okushaya ngaphakathi?
Jenet: Ngithanda igenerations The Legacy.
IL: Ubani umlingisi omthandayo?
Jenet: Uduma Mnqobi odlalwa ngufana Mabaso ongummeli.
IL: Ikhona ikilabhu yebhola oyithandayo?
Jenet: Ngiyibhakabhaka lokuqina kanti umdlali engimthandayo uhappy Jele.
IL: Yiliphi izwe olithandayo noma ofisa ukulivakashela?
Jenet: Yigermany.
IL: Yisiphi isilwane osithandayo?
Jenet: Ngithanda igusha, indlela elilunge ngayo. Engisesabayo inkomo kwazise zihlale zingiphazamisa uma ngiziqeqesha.
IL: Yini oyenzayo uma uvuka ekuseni?
Jenet: Ngiqala ngokuyojima.
IL: Ubani umuntu obukela kuyena?
Jenet: Ngibukela kumqeqeshi wami uthami Khuboni ungisize kakhulu empumelelweni yami. Ngabe kangiyi espain ukube akekho. Kwesinye isikhathi usebenzisa imali yakhe ukuqinisekisa ukuthi ngihambela imijaho ekude nasekhaya.
IL: Uthanda nhloboni yemoto?
Jenet: Noma yiyiphi yakwabmw.
IL: Ugcine nini ukukhala?
Jenet: Ngijwayele ukukhala njalo ejimini kwazise ukuziqeqesha kunzima. Kwesinye isikhathi ngiye ngizame ukwenza isikhathi esingcono singenzeki ngigcine sengikhala.
IL: Uthini umlayezo wakho entsheni?
Jenet: Ngifisa yazi ukuthi impilo inzima kayikho into eza kalula. Ukuze uphumelele kufanele usebenze kanzima. Ukuthi uzalelwephi kakungabi isithiyo sokufeza amaphupho akho.
IL: Ufisa ukuzibona umaphi eminyakeni emihlanu kusuka manje?
Jenet: Njengoba sengingenile eqenjini lesizwe LE-IAAF kuzofanele ngisebenze kanzima ukuze ngingene kwelama-olympic ngowezi-2024.
Nonyaka ngizimisele ukugijima yonke imilenze yespar Grand Prix Series (6) kwazi bani mhlawumbe ngingakwazi ukuhlomula ngale mali etholakala kuyona.