ESKHALENI:
KUNGABA kuhle nxa esankeneneza kubadlali bakuleli amazwi kasteven Pienaar wakuleli osanda kumemezela ukuthi usewabeka ethala amakhokho ngemuva kweminyaka eminingi eyibambe kunobhutshuzwayo.
Upienaar udonse ngendlebe abadlali abagijima kwi-absa Premiership ukungajabuleli ukunethezeka kuleli, kodwa balwele ukuyodlala e-europe ukuze baqine ukhakhayi.
Upianaar ungomunye wabadlali abaye phesheya kwezilwandle besebancane futhi wafike wayimela ngokusezingeni eliphezulu iningizimu Afrika.
Lo mdlali udlalele ibafana Bafana amahlandla angama-61 futhi uke waba ngukaputeni waleli qembu.
Yize egxekiwe ngokuyeka ukudlalela ibafana, kodwa ziyezwakala izizathu azibekayo ngokuzidingisa kulesi sikwati.
Upienaar uyisibonelo esihle kubadlali abasebancane, futhi bangafunda lukhulu kuyena ngoba usebone konke kunobhutshuzwayo.
Lo mdlali ubeyingxenye yenkulisa ye-ajax Cape Town ngaphambi kokunyuselwa esikimini esikhulu.
Akabange esabheka emuva njengoba ethathwe yi-ajax Amsterdam yasenetherlands anqobe nayo idutch Eredivisie ngonyaka wezi-2002 nangowezi-2005.
Ukugila izimanga kuholele eku- theni ajoyine izinkunzi zasegermany iborussia Dortmund nakuyona wadlala ingcwenga yebhola.
Usuke kuyona waya kwi-english Premiership ebalwa namaligi amakhulu emhlabeni ejoyina i-everton wabuye wathi qu kwitottenham Hotspur yakhona e-england.
Ngonyaka wezi-2010 uqokwe njengomdlali ovelele kwi-everton okungeyona neze into encane.
Upienaar uhlale iminyaka eminingi e-england njengoba esonge uhambo lwaphesheya ngokujoyina isunderland egencwe yizembe ngesizini edlule.
Ukuzimisela kwakhe kuholele ekutheni amele ibafana Bafana amahlandla amabili kwindebe yomhlaba yefederation of International Football Association (Fifa).
Ukulobizela ukuyodlala phesheya kwezilwandle kuyinto enhle ngoba kudumisa iningizimu Afrika emhlabeni futhi kuvulela nabadlali abeza ngemuva ithuba lokulandelwa ngamakilabhu amakhulu emhlabeni.
Nokho-ke kumqoka ukuya phesheya komdlali oyolwela ijezi hhayi ukujabulela ukujima nje nezilomo zabadlali. Upienaar nobenni Mccarthy ongumqeqeshi wecape Town City bakhombisile ukuthi impumelelo ikhona kunobhutshuzwayo yinqobo nje uma umdlali ezimisele.
Lezi zingwazi zibuye kuleli sezikwenze konke phesheya kwezilwandle. Upienaar nomccarthy babuye kuleli bengasazele imali kodwa sebesondelela ngasemakhaya.
Okuqaphelekayo ngabo wukuthi bazuze impumelelo ekubeni bekhulele ezindaweni ezigubuzelwe wubugebengu futhi ezinamaqembu ezigelekeqe. Umccarthy ngowasehanover Park, ecape Town kanti upienaar udabuka ewestbury, egoli.
Bobabili bayisibonelo esihle entsheni yakuleli ezimisele ngokuhamba ibanga elide kunobhutshuzwayo. Umccarthy usengene wagamanxa emkhakheni wokuqeqesha, futhi ukufundele phesheya kwezilwandle. Uyaqala ukuba ngumqeqeshi oyinhloko njengoba elolonga icape Town City ayifake kowamanqamu WEMTN8.