Kusolwa imbiza ngokushona kowe-comrades
Ubezilungiselela umjaho wanamuhla eharry Gwala
IGQEMEKE ingozi engeqiwa ntwala ikwazulu-natal kudlula emhlabeni umgijimi wayo obekulindeleke lukhulu kuyena kwitwo Oceans nakwicomrades Marathon nonyaka usiphiwe Ndlela wasexopo obesubathela inedbank.
Lo msubathi kusolwa ukuthi usebenzise imbiza ngemuva kokuba ekhale ngokuxinwa isisu ebuya kozilolonga.
ILANGA Langesonto lithole ngemithombo yalo ukuthi usiphiwe, obezilungiselela umjaho wanamuhla ngesonto iharry Gwala Half Marathon, usebenzise imbiza yokuchatha kwazise ubehlushwa isisu nokuyiyona okuthiwa igcine imthathile. Nokho kuthintwa umndeni uziphikile lezi zinsolo.
Umfowabo kasiphiwe, usizwe Ndlela, ekhuluma naleli phephandaba ukuqinisekisile ukudlula emhlabeni kukamfowabo kodwa wathi kungamampunge ukuthi ubephuze imbiza.
“Usiphiwe ufike ekhaya ngoLwesihlanu ntambama ephuma koziqeqesha engenalutho. Sithe sisahleli wakhala ngobuhlungu besisu ethi siyashisa. Sizame ukumphuzisa amanzi sizitshela ukuthi yinto ezodlula. Ube esecela ukuyolala kanti useyolala unomphela. Eyokuthi uphuze imbiza kasiyazi.
“Nonyaka ubezimisele kakhulu njengoba esanda kungikhombisa amateki akwanike athe uzonqoba ngowo icomrades Marathon. Sizolinda imiphumela yodokotela ukuthola ukuthi udliwe yini,” kusho usizwe oqhube wathi bacabanga ukumfihla ngesonto ekhaya ofafa, exopo.
Usiphiwe kuthiwa ubenabanye ozakwabo aziqeqesha nabo. ngesikhathi bethatha le mbiza ngokwehlukana.
Kuthiwa kuqale undlela ngemuva kokuchatha wakhala ngokushisa kwesisu babe sebemnikezela amanzi ukusidambisana. Kuthiwa uphuze amanzi wabe eseyolala wangabe esavuka.
Lo msubathi ubengomunye wabanethalente kwezokugijima eningizimu Afrika. Umangaze abathandi bezokugijima abaningi ehlomula ngezindondo zegolide emijahweni emikhulu yakuleli okuhlanganisa icomrades, itwo Oceans, isoweto nelegends Marathon ngokwehlukana.
Uhlomule ngegolide kwicomrades Marathon ngowezi-2016 engena unombolo 7 eqopha isikhathi esingu-5:36 nyakenye ungena endaweni yesi-6 ngesikhathi esingu-5:45. Nakwitwo Oceans unamagolide amabili awathole ngowezi-2016 nangowezi-2017. Uphinde wangena nabokuqala abalishumi kwisoweto Marathon ngowezi-2016 ebeka isikhathi esingu-2:27.
Nyakenye ungena isibili kwilegends Marathon (68km) egijinywa phakathi kwebisho nomthatha ebeka u-4:08.
Usiphiwe ubengaphansi kohlelo lo Mnyango Wezemidlalo wesifundazwe lokusiza abasubathi abenza kahle ukuthola ukuziqeqesha okusezingeni eliphezulu ehigh Performance Centre, emoses Mabhida Stadium okuyilona olumsize ukuhlomula ngalamagolide anawo.
Umdu Khumalo oyimenenja kasiphiwe, uthe nabo bafe olwembiza. Uthi ubenethemba lokuthi usiphiwe uzokwenza kahle kwiComrades Marathon yanonyaka ezokuba mhla ka-10 kunhlangulana (June), isukela emgungundlovu isongwe emoses Mabhida, ethekwini.