INKOSIKAZI IGONYULUKA NGESITHEMBU
UMNU Musa Mseleku wodumo lohlelo ukamabonakude Uthando Nesithembu enonkosikazi wakhe uthobeka (umakhumalo). Iphepha ndaba lakho ILANGA Langesonto likuphathele konke ngothobeka nempilo yakhe yasesithenjini.
YISEMINI bebade, kuyaphithizela ehhovisi njengoba kubonakala ikhumbi ebhalwe ukuthi Uthando Nesithembu ima ngaphandle kwebhilidi.
Le khumbi ime maqede kudilike izintandokazi ezibonakala kulolu hlelo (Uthando Nesithembu), oludlala kumzansi Magic 161. Okucacayo wukuthi bonke ozakwethu asebebabonile bafuna ukubabonela eduze laba abehla kule khumbi, bathathe nezithombe.
Bese sivele sihlelile nozakwethu unonhlakanipho Shinga abebexhumana naye ukuthi mina ngizoxoxa nesiphalaphala esingumakhumalo. Kasipholisi maseko-ke uma sebethelekile, ngimdonsela kwelinye ihhovisi, eshiya abanakwabo (umacele, umayeni nomangwabe) nomyeni wabo umusa Mseleku.
UKUNGENA KWAKHE ESITHENJINI
Ube ngumfazi wasesithenjini sodumo sikamnu Mseleku, esafunda isikole uthobeka onguMakhumalo, njengoba umseleku ayelokhu emfungela ngokuthi uyophelela kwakhe nokugcine kwenzekile.
Umakhumalo uthi nakuba kungazange kube lula emndenini wakhe ukwamukela isinqumo sakhe kodwa lapho kukhona khona uthando nendlela ikhona njengoba nabo begcine bendawonye. Lesi siphalaphala esilisebenzisa ngempela ishoba lokuziphungela sithi sikhule siyisishabasheki, sikhuthele sithanda nokucula.
Uthi uthando lwakhe lomculo luze lwamtholela nesidlaliso abesebizwa ngaso nanqabile ukusiveza nobekubukeka sengathi simbangela amahloni. Ngale komculo ubekhonze nezemidlalo, edlala ibhola lezinyawo nelomnqakiswano, ethanda nokusina, nathi usakukhonzile namanje.
“Ngikhule ngimuhle, ngiyingane ehlakaniphile nebikhula ngamandla. Bese ngikwazi ukuzithwesa isigubhu esingu-20 litre, ngikwazi nokupheka ukudla okudlekayo impela nojeqe imbala ngibe ngisemncane kakhulu. Esikoleni bengiyingane ethandekayo kothisha ngoba ngangimuhle kodwa ngingazitsheli.
"Kukhona umemu oze wangithatha wangenza ingane yakhe, engisiza nangezeluleko ngoba eyisihlobo nobaba. Njengoba bengizalelwe ekhaya elingamile kahle benginentshisekelo nje ngisemncane yokushintsha impilo yasekhaya, kungiphatha kabi ukubona abazali behamba ngezinyawo amabanga amade.
"Ngasekhaya emzumbe, Kwamadlala, bebengekho abantu abagqame ngempumelelo njengoba iningi belizishayelela amaloli omoba. Nganginethemba lokuthi umculo yiwona ozongiphumelelisa ngokushesha kodwa akwangenzeka. Sengiqala ukusebenza ngowezi-2009 kugu District Municipality, umusa wayesengilobolile vele, sengihlala nakubo ngoba umamkhulu (Macele) nomayeni abasebekhona babengahlali khona. Akubanga nzima kakhulu khona ekhaya ngoba bebemazi (umseleku) ukuthi ungumuntu onjani nakuba bekunenkingana njengoba besingumndeni okhulele esontweni nokuthi nasekhaya kunomlando waso isithembu ongemuhle. Kodwa bavumile ekugcineni nokuba ngiyohlala khona,” usho kanje ehleka into engapheli.
UHEHWE YIMALI YINI KUMSELEKU?
Ephendula indaba yokuthi umthandiswe yimali yini umseleku, uthi akunjalo ngoba nakuba ebevele emi kahle, kodwa konke okubonwa ngabantu manje bakwakhe bonke ndawonye.
“Angiphumanga ekuhluphekeni ngoba sengazi yena. Ngiqale ngazisebenzela kamasipala ngaphambi kokuba ngisebenze ngokugcwele emabhizinisini asekhaya.
"Ngifike ngahlala kubo kuwumuzi nje ojwayelekile kungekho bazali, sisobabili kuphela.”
Ngale kokubamatasa namabhizinisi uthi akuthokozela kakhulu wukuchitha isithukuthezi ngokuvakashela lapho ezalwa khona ayozihlalela nothofy nosamke abangosisi bakhe kodwa asebefana nabangani kakhulu.
Kakukho nokutheni athi baya kwenza ngale kokuhambela izinxanxathela zezitolo noma bavakashelane ezinkonzweni njengoba bona besonta eluthela kanti yena nomndeni wakhe wakwamseleku bakhonza ethy Will Ministries, eport Shepstone.
IBUHLUNGU EYOKUNGABATHOLI ABANTWANA
Ngesikhathi uhlelo lusafika, kwisizini yokuqala kube nomunyu kuvela isiqephu ebesikhombisa ukuthi unenkinga yokungabatholi abantwana. Uthi bekungahleliwe okwenzeke ohlelweni nakuba vele bese kucacile ukuthi kukhona inkinga ekhona njengoba nomangwabe ofike emuva kwakhe, ubeseshaya ngezingane ezimbili. “Yayilimaza kakhulu inhliziyo yami le ndaba ikakhulukazi ngoba bengazi umusa uyazithanda izingane. Umfazi phela ngumfazi ngezingane kodwa-ke okuhle wukuthi le nkinga siyithathe sayenza eyethu sobabili, sabambisana. Nizobona nje maduze ukuthi sigcina ngasiphi isixazululo ohlelweni. Engikwaziyo kodwa wukuthi ngizoba nayo ingane, kakukhathalekile ukuthi ngizoyithola kanjani kodwa yona izoba khona,” esho emoyizela.
Uthi okubenza baphilisane kahle nozakwabo wukuthi kababeki indaba yesithembu phambili kodwa baqhakambisa into eyodwa, okuwukwakha umuzi, bangawutheli ngehlazo.
UNGUMELULEKI UMA ENGEKHO EMZINI Abanye bamuzwa kwigagasi FM kwisigatshana esithi Dear Makhumalo: Izinto Zothando, lapho ekhipha khona iziyalo ngezothando, imindeni nempilo nje. Uthi ukwenza lokhu ngoba abantu bayadinga ukuboniswa, bavuseleleke.
Akagcini nje kwigagasi FM, uyamenywa kwizithangami abuye aluleke izingane njengoba nesizulu sithi ugotshwa usemanzi, ukuze zingaphili impilo yamaphupho, zazi okuyikho ngempilo. Banezinhlelo ngaphansi kwenkampani yomndeni ekhiqiza uhlelo, ithanx Ma Productions, benze nezimpahla zokugqoka eziqale ukubonakala ohlelweni ngesonto eledlule. Uthi eziqondene naye zizobe zibhalwe umyalezo othi: I am original, keep your opinions about me to yourself.