Bathwelwe ngeqoma abakuleli kwicomrades
Bazobhekana nabaqhamuka emazweni angu-81
UTHWELWE ngeqoma ugerda Steyn, waseningizimu Afrika, ukuba avikele isithunzi sabasubathi besifazane bakuleli kwicomrades Marathon ezokuba ngeSonto mhla ka-10 kunhlangulana (June) isukela emgungundlovu isongwe emoses Mabhida Stadium, ethekwini.
Ukwethenjwa kukasteyn kulandela ukwenza kahle kwakhe enqoba itwo Oceans Marathon yanonyaka ebingempelasonto yePhasika ecape Town.
Ucuan Walker ongumhlaziyi wezokugijima kuleli, ulibeke ngembaba elokuthi ubona usteyn ezokuba yingqwele esigabeni sabesifazane.
Uthi ukuhoxa kukacaroline Wostmann - ogile izimanga ngo2015 eba yingqwele yayo yomibili le mijaho - yikhona okwenza athwale ngeqoma usteyn. Ucuan uthi ukwenza kahle kuka-steyn kwitwo Oceans yikhona okumenza imfivilithi nakwico-mrades.
“Nakuba bebaningi abasubathi abasethubeni lokwenza kahle kwicomrades yanonyaka kodwa kwabesifazane kangingabazi ukuthi usteyn uzonqoba.
Abanye abasethubeni lokwenza kahle yingqwele yanyakenye ucamille Herron wase-united States of America, ucharne Bosman ukubala nje abambalwa,” kusho ucuan.
Uqhube ngokuthi kuzocinana utshumo esigabeni sabesilisa.
“Kwabesilisa kulukhuni satshe ukuqagula ukuthi ngubani ongase adle ubhedu. Ngokwami bathathu abasubathi abasethubeni lokwenza kahle, yingqwele yanyakenye ubongumusa Mthembu, udavid Gatebe owenze irekhodi ngo-2016 umjaho uphelela ekingsmead Stadium nogift Kelehe onqobe ngo-2015,” kusho ucuan ophethe ngokuthi ukuba kude kwebanga lanonyaka kwenza irekhodi likaGatebe liphephe.
* Ingenelwe ngabagijimi abaqhamuka emazweni angu-81 icomrades yanonyaka. Lokhu kudalulwe yicomrades Marathon Association (CMA).
Iningizimu Afrika yiyona enabasubathi abaningi abangu-21 143 kulandele igreat Britain ngabangu-291 bese isithathu kuba yibrazil ngabangu-236 kwehle njalo.
Umjaho wanonyaka uphethe isi- teki sika-r475 000 kwizingqwele kubo bobubili ubulili kanti ungenelwe ngabasubathi abangaphezulu kuka-23 000.
zondim@ilanganews.co.za