Imizuzu yokugcina kamjikijelwa noyise
Kungene umqhafazo kwichalaha lacasuka, lalahla ifoni
UPHITHENE amakhanda umndeni wesilomo somculo kamaskandi usbongiseni “Mjikijelwa” Ngubane (35), ngokudlula kwakhe emhlabeni. Umjikijelwa bekunguyena obekuthenjelwe kuye, obondla umndeni.
Uyise umnu Funukwenzani Ngubane, utshele ILANGA
Langesonto ukuthi akuvumi ngisho ukuba akhulume uma ecabanga ngesehlakalo sokudlula kwendodana yakhe emhlabeni.
“Ey’ bekuyindoda lena! Ihlale izihlekela, ingakuthandi nokuqophisana nomuntu - ibivele ikhethe ukumyeka,” kusho umnu Ngubane. Uqhube wathi:
“Ukugula kwakhe kungixakile, ngize ngaya kombona (esibhedlela) ezinsukwini ngabona ukuthi kumbambile (ukugula).”
Utshele leli phephandaba ukuthi ayizange imphathe kahle umjikijelwa imibiko engemihle ngaye yabezindaba ngesikhathi esesibhedlela.
“Ngesikhathi ngisesibhedlela ngiyombona kuke kwangena umqhafazo efonini yakhe wavele wathatha ifoni wayilahla laphaya kude, lavuka ngamandla iphika kube sekuvela ukuthi ubebona zona izinto ezingezinhle ezikhulunywa ngaye nasezinkundleni zokuxhumana,” kusho umnu Ngubane.
Ukudlula emhlabeni kwendodana yakhe uthi kumphithanise ikhanda kwazise naye uvuka ekuguleni, ubephethwe yisifo sohlangothi.
ILANGA Langesonto lifike kubo kwamjikijelwa kwajikijiki, Kwamaphumulo, isimo simuncu, kuqhuma isililo, abantu bengena bededelana. Ingoduso yakhe umaMkhize ibisithelwe ngamanzi yaze yakhishelwa emnyango ingasakwazi nokukhuluma.
Esinye isalukazi sendawo unkz Qondeni Mkhize, sithe bafe olwembiza ngokudlula emhlabeni kukaMjikijelwa ngenxa yosizo lwakhe.
“Angisenamuntu, ngihlala ngedwa kwami, kodwa ngelinye ilanga wake wafika umjikijelwa wazongipha imali ngesikhathi ngigulelwa yingane yami. Bengithi ngisazombonga nje ngimuphe inkukhu, ngibonge inhliziyo yakhe enhle,” kusho unkz Mkhize ekhala.
Uyise kamjikijelwa uveze nokuthi kwakuvele kubonakala ukuthi indodana yakhe izokhula ibe ngumculi ngoba ebunganeni bayo yayiyithatha ngisho ifihliwe i- radio, idlale amakhasethi bese iyibeka kahle ( radio) yenzela ukuba ingalimali.
Umjikijelwa ushona nje, ubesanda kwakha umuzi omusha wakwabo. Ushiye izingane zakwabo eziwu-9, unina umankwanyana nezingoduso zakhe ezimbili okungumamkhize onezingane ezimbili nomabuthelezi, osakhulelwe.
Ngozibandlela (December) umjikijelwa uzishaye zonke izinkomo zelobolo kubo kwamabuthelezi, sekusele ukuba ziwushaye, kanti umamkhize yingoduso yakhe ayithathe engakazimeli ngisho emculweni, esagida kuMgqumeni “ibhova” Khumalo (ongasekho).
Ngaphandle komculo, ubenamatekisi awu-4, okuyimanje asebenza ukuthutha
umphakathi egoli.
Ngesikhathi ngisesibhedlela ngiyombona, kuke kwangena umqhafazo efonini yakhe wavele wathatha ifoni wayilahla laphaya kude, lavuka ngamandla iphika, kwabe sekuvela ukuthi ubebona zona izinto ezingezinhle ezikhulunywa ngaye...