Kwabakweleta umasipala
Kabazuvalelwa ugesi kunalokho bazosebenzisa i-pre-paid
UTHEMBISE inkululeko kwabasindwa yizikweletu ethekwini, oyimeya uzandile Gumede, ethula isabelo mali saleli dolobha ngolwesine emini, ecity Hall.
Uthi labo abanezikweletu eziphezulu zikagesi ngeke nje bavalelwe ugesi bese behlala ebumnyameni kodwa bazolekelelwa ngokuba banikwe amamitha angama- pre-paid uma besahlela ukukhokha izikweletu.
“Kakuyona into enhle ukuvalelwa ugesi, yingakho sesiqale uhlelo lokuba umuntu akhokhe amainstalment ukulungisa isikweletu sakhe kodwa akwazi ukuthenga nge- pre-paid ugesi azobe ewusebenzisa.
“Sinenselelo yabantu abathola ama- bill amakhulu abagcina bengakwazi ukuwakhokhela, yingakho sesiqala uhlelo olusha oluzokwaziwa ngo-80/20 noluzolekelela umphakathi,” usho kanje.
Enkulumeni yakhe ugqamise kakhulu ukulekelelwa kwabahlwempu nokulwa nenkohlakalo nakuba abanye bebekhala ngokubheceka kukamasipala wakhe kuyo inkohlakalo.
Kuzokhumbuleka ukuthi muva nje kuphume imibiko yokusatshiswa kwezisebenzi zehhovisi lomcwaningi wamabhuku ebezicwaninga amabhuku kulo masipala, zaze zashiya phansi umsebenzi.
Ephawula ngamabhuku ezimali ethekwini uthe konke kuhamba kahle.
“Asidli la, siyasebenza, silwa nenkohlakalo. Ngibavumelile abaphenyi ukuba benze umsebenzi wabo ngokukhululeka, kuboshwe okufanele baboshwe. Sesisungule ikomidi lokuqondisa izigwegwe nelokusula izinkampani ezingasebenzi ngendlela.
“Zingama-42 kuyimanje esezivaliwe, kwaboshwa abebedayisa izindlu zomxhaso, abebethembisa abantu imisebenzi bese bebathathela izimali nabebedayisa opla- stiki bakadoti,” kusho yena.
Uqhube wathi: “Ishaka Marine NE-ICC okuyizindawo zethu eziphethwe ngabesifazane zithole imibiko yabacwaningi mabhuku engenagcobho.
“Kakusho mina kodwa kusho osolwazi, itheku liqhelelene kakhulu nesimo sokuba kuvucu. Kuningi khona okumele kulungiswe kwezomnotho njengoba uqhoqhobelwe ngabamhlophe, ama-ndiya nabavela kwamanye amazwe.
Kumele sikhulise ezokuvakasha emalokishini, osomabhizinisi abakhulu nabancane babelane. Abekho abanelungelo lokwesabisa abanye kodwa kumele kwabelwane, likhulu kakhulu leli khekhe.”
Ephawula mayelana nokuthathwa ngodli komhlaba osekuyinsakavukela umchilo wesidwaba ezindaweni ezahlukene ezweni uthe kabahambisani nakho.
Uthe ezinye zalezo zindawo basuke bezibekele ukuzisebenzisa ukuthuthukisa imiphakathi.
Okunye akubalulile wuhlelo lokwenyuswa kwesibalo samaphoyisa omkhandlu kusukela ngolwesihlanu (01 June), wukusabalaliswa ko- plumber asebebaqeqeshile ukulwa nokuvuza kwamapayipi amanzi, wukwandiswa kwezindawo okuzotholakala kuzo i-wifi yamahhala zifinyelele ku-140 ngaphambi kokuphela konyaka nokunye.
zowakha@ilanganews.co.za I-EFF izimisele ngokuba kudilizwe esikhundleni imeya yetheku, unkk Zandile Gumede. Leli qembu likhala ngokuthi kalimethembi unkk Gumede. Ngolwesine ngesikhathi imeya yethula inkulumo yayo ngesimo setheku (State of the City Address) I-EFF ishaye edume ngazo, yaduba yaphuma.
Ngesikhathi imeya isandlalela inkulumo yayo, I-EFF iqale umsindo ingafuni ukuba aqhubeke. Kuqale umholi wayo emkhandlwini, ukhansela Bonginkosi Ngiba, onxuse ukuba kuqalwe odabeni abebeluphakamise kusomlomo womkhandlu ngayizolo.
Usomlomo umnu William Mapena, uphendule ngokuthi kasikho isidingo sokuphazamisa inkulumo ngoba ubebaphendulile phambilini, kwabe isisukile. Bebelokhu behhomuzela ngesikhathi iqhubeka nenkulumo. Emuva kwalokho bathathe izikhwama zabo baphuma.
Engxoxweni abe nayo NELANGA Langesonto umnu Ngiba, uthi bacasulwe wukuthi usomlomo uhubhuze amanga wathi indaba abebeyiphakamisa ixoxiwe, kwadlulwa kuyo ekubeni kungenzekanga.
“Uzokhumbula ukuthi zolo lokhu kube nokusatshiswa kwabaphenyi mabhuku emkhandlwini, ngakho imeya kasisayethembi.
“Sengibe kulo mkhandlu iminyaka kodwa kuningi okuvele kwashintshwa yimeya kanti thina besifuna luxoxwe lolu daba. Bona bavele bakufuqe ngemiqingo sekuyiwa emhlanganweni, nongadinga cishe inyanga yonke ukuyifunda,” kusho umnu Ngiba.
Uthe imeya ithe ifika nje yathatha ihhovisi ebelibheke umnyango wezezimali yalifaka ngaphansi kwayo. Uthe bafuna yehle esihlalweni ngokushesha ukuze kubuye ithemba nesithunzi setheku.