BADINGA UKWESEKWA ABANE-BIPOLAR
NGOKOMBIKO we-south African Depression and Anxiety Group (Sadag), kuthiwa bangaphezu kuka-4 million abanesifo esibizwa nge-bipolar, nokuyisifo okuthiwa singunombolo-6 ekudaleni ukukhubazeka. Yize isibalo sabantu abanalesi sifo sikhuphuka mihla namalanga kodwa abanaso basazithola becwaseka emphakathini.
Kwesinye isikhathi uma uke waphumela obala ngokuthi une-bipolar kuvele kuthiwe uphambene ekhanda, ikakhulukazi emiphakathini yabamnyama. Lokhu kukhomba ngokusobala ukuthi kusamele abamnyama bafundiswe kabanzi ngezigulo ezithinta umqondo.
Akungabazeki ukuthi sonke siyaba nezikhathi lapho sisemuzweni wokujabula noma wokukhathazeka - mhlawumbe uthole ukuthi uxabene nesinqandamathe sakho bese uzithola ukhathazekile. Kubantu abane-bipolar le mizwa yehlukile.
IYINI I-BIPOLAR?
Lesi yisifo sengqondo esihambisana nemizwa lapho kutholakala ukuthi lowo onaso uma ejabule, ujabula ngokweqile kanti uma ekhathazekile, ukhathazeka ngokweqile kungenasizathu.
ILANGA Langesonto likhulume nodkt Manqoba Myeni, osebenzela edurdoc Medical Center, ongudokotela wezengqondo osichazele kabanzi ngalesi sifo.
“I-bipolar yisifo esingakhethi bala lamuntu, futhi esiphatha noma ngubani. Asicwasi ngisho nangokwesimo somnotho. Thina bantu abamnyama uma umuntu ene-bipolar siye sithathe ngokuthi uyahlanya kanti akunjalo. I-bipolar ithinta ukuphazamiseka kwemizwa nokudideka engqondweni," usho kanje.
IZIMPAWU ZOMUNTU ONE-BIPOLAR:
Uba nenkinga yokuziphatha, uthole ukuthi uzochitha imali budedengu
Enze ucansi ngokwedlulele kungakhathelekile ukuthi ulwenza nobani futhi kungekona ukuthi uyaluhalela nokungagcina kumenze wathola izifo zocansi ezifana NE-HIV/AIDS ngenxa yokuthi ulala engazivikelile
Uhlezi ecabanga izinto angazenza, mhlawumbe afise ukwenza ibhizinisi elithile kodwa agcine engalenzanga, uthole ukuthi uzosheshe adikibale Angakwazi ukulala ebusuku Abe nomdlandla owedlulele Anciphe emzimbeni Abone izinto ezingekho Abe nokuzethemba okwedlulele Akhulume angaqedi Wenza izinto budedengu Akakwazi ukuzilawula, okungagcina kudale ukuba aboleke izimali emabhange, azithole esecwila ezikweletwini.
IDALWA YINI-IBIPOLAR
Udkt Myeni uthi: “Yenziwa yizinguquko ezenzeka kumakhemikhali atholakala ebuchosheni bomuntu. Kuyenzeka kwabanye abantu kube nento ezomhlukumeza umqondo agcine ezithola esene-bipolar.
Uqhuba athi kuyenzeka futhi kube yinto ewufuzo, uma kungukuthi ukhona owake waba nayo ekhaya. Kuyenzeka futhi iphathe abesifa-zane uma bekade beqeda ukubeletha,” usho kanje.
KUNGABE IYELAPHEKA YINI?
Yebo iyelapheka ngemithi yodokotela. Mayelana nokuthi leyo mithi uyidla isikhathi esingakanani uthi kuya ngokuthi uzimisela kanjani uma uyidla, kanti imiphumela futhi yiyo eshoyo ukuthi uzoyithatha isikhathi esingakanani. Ukwelulekwa ngokomqondo kungezinye zezinto ezisiza kakhulu ekuyelapheni.
YINI ONGAYENZA UMA UNE-BIPOLAR
Uma unalesi sifo usuke ungakwazi ukuzilawula. Yingakho uthola ukuthi abanye bagcina sebesebenzisa imali ngokweqile. Udkt Myeni uthi:
“Kubalulekile ukuba unciphise indlela osebenzisa ngayo imali. Uma kungukuthi ushadile uthi kuhle unikeze inkosikazi ikhadi lasebhange ukuqinisekisa ukuthi awuzitholi usebenzisa imali ngokweqile kwazise kusuke kunzima ukuzilawula,” usho kanje.
Uthi kubalulekile ukuba uma umndeni wazi ukuthi unelunga eliphila ne-bipolar uleseke.
“Uma unelunga lomndeni elinebipolar kumele wazi ukuthi akusiso isifo eningasithatha kancane. Qinisekisa ukuthi lowo onalesi sifo uyidla ngokufanele imithi futhi ubonana nodokotela uma kufanele. Ukuba nalesi sifo akubaphazamisi ndawo, bayasebenza futhi bafunde njengawo wonke umuntu.