EZEMISAKAZO:
UBUXOKI noma ukuchema yinto engasoze yaphela emsakazweni nakuba lokho kungachazi ukuthi kuyinto eyamukelekile.
Ezinsukwini zanamuhla kuqhakambiswa ukuthi o- producer yibo abanquma ngakho konke ngohlelo kodwa siyazi ukuthi lokho kakulona iqiniso eliphelele.
Abasakazi banomkhulu umthelela ngokwenzeka ohlelweni.
Ngeke wasola muntu futhi ngalokhu ngoba kubalulekile ukuba into oyenzayo uyizwe ngaphakathi, ngakho-ke njengoba kungumsakazi ompongoloza embhobheni kumele abe nesandla kwazokhuluma nga-kho.
Ngeke kwalunga ukuba aqhamuke esefunzwa nje kwazise okuningi okukhulunywa nguye kakubhaliwe phansi kodwa yena unikezwa umkhondo nje okumele akulandele.
Ngithinta eyokuchema nje yingoba kube nezinkulumo eziningi emva kokudlula emhlabeni komculi kamasikandi umjikijelwa umfokaNgubane obefihlwa izolo.
Kunabathile abebephakamisa eyokuba nezakhe izingoma zidlale ziphindelelwa njengoba kujwayeleke ukwenzeka uma kukhona umculi oshonile. Owami umbuzo ohlala umile uthi ungalindela kanjani ukuba isiteshi esingawudlali nhlobo umasikandi siqale siwuqhulule ngoba nakhu sekuvele isifo?
Uzoqala kanjani umsakazo ukwazisa abalandeli ngomuntu ngoba engasekho ekubeni bengaludlali nhlobo lolo hlobo lomculo?
Kunezinhlobo zomculo ( genres) ezigxila kubalaleli bohlobo oluthile nokujwayele ukuba izinhlelo zakhona zibe yizigatshana. Izinhlobo esikhuluma ngazo yi- jazz, reggae, gospel nowesintu okungaba umasikandi, isicathamiya njalo njalo.
Lezi zinhlobo zezinhlelo kazilandelwa yiningi elilalela umsakazo kodwa zilandelwa ngabazifela ngalolo hlobo nje lomculo.
Kungaba yinto enzima-ke ukuba umsakazo unqume ukudlala lezi zinhlobo zomculo usuku lonke. Ukukubeka nje kucace yinto engasoze yenzeka leyo ngaphandle uma kuwukuthi leso siteshi vele sidlala lolo hlobo lomculo.
Khumbula phela kuneziteshi ezidlala i-gospel noma i- jazz kuphela nokungaba yinto elula ukuba ziqhulule izingoma zomuntu okuvele isifo ngaye, usuku lonke. Vele phela zila- lelwa yilolo hlobo lwabantu.
Impi ngomjikijelwa ibizifanela nje nokuthela amanzi emhlane wedada.
Khumbula futhi ukuthi isinqumo silele kuwona umsakazo njengoba kumele ubhekelele phambili izidingo zomlaleli nabezikhangiso nokuyizona zinto ezimisa umsakazo.
Elokuchema-ke lingena khona la! Uzoqaphela ukuthi abanye abasakazi bayakwazi ukuzimpintshisa izinto ezisondelene nabo nakuba kucaca ukuthi kazihambisani nohlelo.
Kuyabaxaka lokhu ngoba kuyabuya uma sekuqondene nomunye umuntu bese kuba yinkinga ngoba engasondelene nalowo msakazi.
Kakuzange nje kungimangaze nakancane ukuthi umjiks akazange athole ukuqhakambiswa njengezinye izihlabani ezidlule emhlabeni phambilini. Kakusiwonke wonke oyomenyezwa ubusuku nemini emsakazweni uma esedlulile.
Singayithokozela kakhulu neyakho imibono ngakho konke okuthinta ezemisakazo kule email engezansi nasezinkundleni zokuxhumana okutholakala kuzo umbhali. Instagram: @zowakha Facebook: Zowakha Mbatha Twitter: @Zowakha