Imbangela nomthelela wokwenyuka kukaphethiloli
ISIMEMEZELO sakamuva ngokwenyuka kwentengo kaphethiloli, nakuba lokhu kungesiyona into eqalayo ukwenzeka, sibonakala sizogadla ngokwedlulele kubathengi nasemnothweni njengoba amanani anyusiwe ezoqala phakathi kwamabili ngolwesibili kuleli sonto.
Imithombo yezindaba isibikile kabanzi ngembangela nemiphumela yokuthinteka komnotho ngenxa yokwenyuka kwentengo kaphethiloli. Ngenxa yokuhlobana kwezomnotho nezombusazwe, uma kunesimo esinyakazisa omunye kule mikhakha, ngeshwa nomunye uyathinteka.
Ngokuphawula kwabenhlangano yezezimoto, i-automobile Association (AA) ngombasa (April) nonyaka, amanani entengo kawoyela ongahluziwe abengakhuli kodwa kuthe lapho kuqubuka udungunyane lwasesyria, lawa manani avele aqonga abheka phezulu.
Ukuphawula kwabo kuqhubeka kuthi amanani entengo kawoyela ongahluziwe asenomlando okhombisa ukuthi ayazwela esimeni esingenalo uzinzo sale ngxenye yomhlaba esempumalanga emaphakathi kwazise iseduze kwamazwe asemqoka emhlabeni jikelele ngokukhiqiza uwoyela.
ILANGA Langesonto like lathintana nongoti wezomnotho uprof Bantubonke Dumisa ukuba alicobelele ngalolu daba, abuke agxile kuleli zwe lethu.
Wendlalele ngokuthi phambilini izinkundla zokuxhumana akusiyona into abekunakile ukungena aphawule kuzo, kepha ngenxa yemfundisoze ayibona isabelele kuzo, ubone kungcono adamane ephonsa itshe esivivaneni ngemibono yakhe emkhakheni wezomnotho.
Uphawule wathi into yokuqala okumele abantu bayiqaphele yiqiniso elithi intengo kawoyela ongahluziwe ayiphathelene nezombusazwe waseningizimu Afrika, ngenxa yokuba uncike ezintweni ezithinta umnotho wamazwe ngamazwe.
Kulokho kuphonsa kwakhe itshe esivivaneni uprof Dumisa, uthi ubelokhu eshilo ukuthi umphakathi waseningizimu Afrika, mawulindele ukwenyuka kwamanani entengo kawoyela ngenxa yalezo zinto ezithinta umnotho ezenzeka emhlabeni wonke.
Umhlahlo wakhe uthi ubewenza ngokuqaphela okwenzeka emananini omcebo onjengegolide, yiplatinum kanjalo nowoyela. Njengoba umhlahlo weningi lezingqapheli zezomnotho unkankanya ukuthi amanani angase enyuke afinyelele ku-r17.00 ilitha likaphethiloli ngontulikazi (July), akathukanga nxa uhulumeni ememezela ukwenyuka kwentengo ngo82c elitheni kuleli sonto elisombulukayo.
Okwenzekile kube yilokhu okubizwa nge- underrecovery yesikhwama sezamandla sikahulumeni, icentral Energy Fund ephansi komnyango wezamandla.
KANJANI NA?
Kule nyanga ngonyaka odlule, uwoyela ongakahluzwa wabe ubiza $55 USD umphongolo. Njengoba kuphela unhlaba (May) inani likawoyela ongahluziwe bese livele selingu $68 USD - nokuyikho okubangele leyo underrecovery.
Omunye futhi umthelela kube wukwehla kwamandla emali yethu irandi. Phela isimemezelo esenziwe ngokuxhamazela sokuthi imfundo ephakeme emanyuvesi isizotholakala mahhala kuphoqe leli zwe ukuba phakathi kokunye lenyuse IVAT, kuthi enye imali liyeboleke.
Wathi lokhu kwenza imali yezwe iphelele ekukhokheni izikweletu esikhundleni sokungena ezinhlelweni zikahulumeni zokusebenzela abantu balo.
Okunye futhi okubonakale kwenzeka kumbasa
(April) nangonhlaba nonyaka
(May), ezi- makethe zezimali irandi lehlele ku-r12.20 ngombasa (April) laya ku-r12.69 ngonhlaba (May). Nalokho futhi kube nomthelela we- underrecovery ngoba phela uwoyela ongakahluzwa ubusuwenyukile ku-$55 USD ngonhlangulana (June) nyakenye waba ngu$68 USD ngonhlaba (May) nonyaka.
Ngeshwa isimo sezombusazwe esisibona senzeka njengamanje ngenxa yokushuba kwesimo sasemazweni asempumalanga emaphakathi, inhlangano yamazwe akhiqiza uwoyela eyaziwa ngelithi yi- Organization of Petrolium Exporting Countries (OPEC) inqume ukuba lawo mazwe ehlise umthamo womkhiqizo kawoyela ongahluziwe. Lokhu kwenza kube nokuntuleka kukawoyela okwenziwa ngabomu, bese kwenyuka amanani awo.
Ngesikhathi amanani kawoyela ephansi, amanye amazwe nawo akhiqiza uwoyela ayawunqwabela ezinqolobaneni zawo, phecelezi stock piling.
Kuyothi lapho amazwe E-OPEC esewenyuse wafika enanini elithile umphongolo, bese amazwe evula ezinqolobaneni zawo ukuze ube mningi uwoyela emakethe, bese lokho kuwaphoqa amazwe E-OPEC ukuba awehlise amanani awo.
Uprof Dumisa uthi njengoba kunokungahoshelani nelase-iran ngodaba lesivumelwano senuzi, imelika ithe mayinswinywe kwezomnotho i-iran. Akwaziwa-ke okwamanje ukuthi yini engase ilandele lokhu.
LOKHU KUMBEKAPHI UMUNTU PHAQA?
Uprof Dumisa uthe ngeshwa ukwehla kwamandla omnotho, phecelezi inflation, isimo sakho esikade sinozinzo, manje sekuxukuzwe YI-VAT nentela kaphethiloli yesikhwama sezingozi zomgwaqo i-road Accident Fund, okwenzeke ngombasa (April) nonyaka, neyenze lenyuka inani likaphethiloli.
Phambilini phela iroad Accident Fund ibikhokhelwa ngomshwalense owawubizwa nge 3rd Party, okwakune- disc enamathiselwa ewindini lemoto yokubonisa ukuthi imoto nemoto ikhokhelwe njalo ngonyaka.
Wengeza ngokuthi kulokho kwehla kwamandla omnotho singase silindele iminyakazo yabasebenzi ngeziteleka ezingase zilimaze izwe lakithi lingenge engozini yesigaba somnotho esiwuvucu.
bonginkosi@ilanganews.co.za