UMNCEDISI MKHIZE UDALULA OBEKUMENZELA PHANSI KWI-COMRADES
UMNCEDISI Mkhize ( osesithombeni) ongomunye wabasubathi abathwele ithemba lekwazulu-natal kwicomrades Marathon ufuna ukubhala igama lakhe emjahweni wanonyaka ozokuba ngesonto usukela emgungundlovu usongwe emoses Mabhida Stadium, ethekwini.
Umkhize usegijime lo mjaho amahlandla angu-13 kanti ukwaze ukuqeda imijaho engu-9. Unamagolide angu-7 namasiliva amabili.
Umkhize utshele leli phephandaba ngoLwesihlanu ukuthi usekwenze konke ukuwulungiselela.
Uthi usezame kaningi ukuwunqoba kodwa ahluleke. Umkhize ujabulise ikwaZulu-natal yonke ngo-2007 ngesikhathi engena endaweni yesithathu.
“Sengizame kaningi ukudla ubhedu kulo mjaho kodwa izinto zingiphike. Nonyaka kufanele noma kanjani ngiwunqobe kwazise neminyaka iyahamba. Njengoba ngikhula nje, nesivinini siyaphela.
"Kangikwazanga ukuwuqeda lo mjaho nyakenye ngenxa yokulimala kanti nonyaka ngiphile saka.
"Uma ngizokwenza njengakwizululand Ultra Marathon lapho engingene khona endaweni yesine, kangingabazi ukuthi ngizokuba yingqwele ngesonto.
“Into ebingiphazamisa phambilini wukuthi bengingahambi nebhantshi leli eliphambili, bengigijima kakhulu uma sekwedlulwa kwihalf Way Mark kanti nabo yilapho bekhuphula khona amasokisi, bese kuba nzima ukubafica.
"Nonyaka ngizokube ngihamba nabo. "Ngendlela engiqatha ngayo kuzokufa ofayo,” kusho umkhize oneminyaka engu-37 ubudala.
Lo msubathi wemaxed Elite ukhonze ukuzijimela ngayedwa. Uthe ubenza amakhilomitha angu-250 ngesonto, okwenza abe ngu-1000 ngenyanga.
“Nonyaka kunabagijimi ababili ebengijima nabo. Bengibabeka phambili ngamakhilomitha angu-5 kodwa bengikwazi ukugijima ngize ngibadlule.
Uma ngehlulekile ukunqoba ngesonto, okungenani kuzomele ngingene nabokuqala abangu-10 ukuze ngandise izindondo zami zegolide kulo mjaho,” kusho umkhize onesikhathi esingu-5:32 kwicomrades asenze ngo-2007.
Abasubathi okubhekwe ukuba badlisele ogageni umkhize ngubongumusa Mthembu oyingqwele, udavid Gatebe ophethe irekhodi lalo mjaho u-5:18 uma kwehliwa, ugift Kelehe onqobe ngo-2015, uludwick Mamabolo ohlale njalo engena nabokuqala abayisihlanu, ukubala nje abambalwa.