ISENGCUPHENI YOKULAHLEKELWA NGUMQEQESHI IKILABHU YASE-KZN
ISENGCUPHENI yokulahlekelwa ngumqeqeshi ikilabhu yakwazulu Natali njengoba kuvela ukuthi usephenduke inyama emakilabhini agijima kwi-absa Premiership nakwinational First Division (NFD).
ILANGA Langesonto lithole ngemithombo yalo engashayi eceleni ukuthi usimo “Govuza” Dladla ongumqeqeshi wereal Kings ufunwa uthuli ngamakilabhu agijima kwipremiership nakwinfd.
Kuthiwa iningi lawo afuna azoba ngumsizi womqeqeshi omkhulu.
Kuthiwa amthembisa imali econsisa amathe.
Phakathi kwamakilabhu okuvela ukuthi ayamfuna kungabalwa ibaroka FC, Free State Stars, Polokwane City ne-orlando Pirates okuthiwa ifuna abuye aqeqeshe iqembu le-multichoice Diski Challenge.
Emasontweni amabili edlule udladla kuthiwa uhlangane nezikhulu zebucs obekukhona kuzo indodana ka-irvin Khoza, umpumi ukuzobhunga ngodaba lwakhe.
Kuthiwa kulo mhlangano ukhombe lezi zikhulu kubongani Ngidi ongumnikazi wekings ukuba ziqale zikhulume naye kuqala.
Nokho udladla uyaphika uthi ubehambise umbiko ngobrian Hlongwa amuboleke kwibucs, nangabanye abadlali abangase bamuboleke bona njengoba kuqala isizini.
Leli phephandaba lishayela ujohn Wilson ophethe izindaba zikadladla ukuba aphawule ngalolu daba uthe: “Kuyiqiniso ukuthi kunamakilabhu amfunayo kwiAbsa Premiership nakwinfd.
Amanye sengiziqalile izingxoxo nawo amanye kufanele ngihlangane nawo kuleli sonto elizoqala.
Kodwa engifuna ukukucacisa wukuthi akukho esizokwenza ngaphambi kokuba athole izibusiso kungidi.
Njengamanje usangumqeqeshi wekings futhi uzinikele emsebenzini wakhe
Kodwa kumqoka ukubuye ukhule uma ungumuntu ungazijwayezi ukuhlala endaweni eyodwa ngoba ukhakhayi aluqini,” kusho uwilson ophethe abaqeqeshi abahlonishwayo okungabalwa kubona ugavin Hunt webidvest Wits noruudi Krol osanda kusayina kwics Xfaxien.
Leli phephandaba lingakuqinisekisa ukuthi akhona ngempela amakilabhu afuna lo mqeqeshi njengoba kunezikhulu ezimbili zagijima kwipremiership ezike zashayela intatheli zibuza kabanzi ngodladla.