UPHINDE WASHAYA UDAKA UNGQONGQOSHE NGE-SWALLOWS
UPHINDE washaya udaka upanyaza Lesufi ongungqongqoshe wezemfundo egauteng ohola ithimba labalandeli abasemizamweni yokuvusa iswallows FC.
Kuzokhumbuleka ukuthi kumasizini amabili edlule ulesufi umemezele ukuthi iswallows ithenge ifree State Stars.
Abalandeli bajabulise okwezingane kwazise bese kuphelile ngeswallows.
Kubhuntshe yonke into ngemizuzu yokugcina kuvela ukuthi imali kayibonwa, abantu abebe- muthembise ukufaka imali bashaye utshani. Ulesufi ukuphindile lokho njengoba bekusanda kusabalala imibiko yokuthi iswallows FC izogijima kwinational First Division (NFD) ngesizini ezayo njengoba bekuthiwa ithenge ilungelo lecape Town All Stars edlala kulesi sigaba.
Kubhede uhlelo kuvela ukuthi icape Town All Stars ithengwe ngutim Sukazi weqt Sports, isizoba yits Galaxy.
Ulesufi uthi nakuba libaphunyukile ithuba lokuthenga i-all Stars kodwa ngeke baphele umoya.
“Ngicela abalandeli bekilabhu balinde sizobazisa maduzane ngokuzokwenzeka.
"Njengamanje ngilinde ukuzwa kubammeli bethu ukuthi kwenzakaleni ngodaba lokuthi sithenge i-all Stars bese sinquma ukuthi sibhekaphi.
"Kufanele ngithole ukuthi inkinga ibe kuphi kuqala ngaphambi kokuba sidlulele phambili.
"Ngomsombuluko cishe ngizoba nolwazi oluphelele.
"Akhona vele amanye amakilabhu ebesike saxoxa nawo ngakhoke uvalo asinalo, abalandeli abakhululeke,” kusho ulesufi.