Sidinga ukucophelela isiphakamiso sowezemfundo
UNGQONGQOSHE wezemfundo kuzwelonke unkk Angie Motshekga usememezele ukuthi uhulumeni uhlongoza ukuba bonke abafundi ezikoleni baphoqeleke ukuba benze isifundo somlando ( history) futhi basiphase ngaphambi kokudlulela ekilasini elilandelayo.
Uma udlulisa nje amehlo ngalesi siphakamiso, ungasicwaningisisi kahle, singazwakala siwumbono omuhle. Inkinga iqhamuka nxa ususibhekisisa, ujula ngaso. Umbuzo ovelayo uthi kungani lesi siphakamiso siqhamuka manje, futhi labo abaqhamuka naso bahloseni ngaso.
Umlando kawufani nezilimi ( languages), ngoba zona kazidingi ukutolikwa. Ukwenza isibonelo nje, kungaba lula kuhulumeni ukushaya umthetho othi zonke izikole zakwazulu-natal, kufanele zifundise isizulu bonke abafundi njengoba kwenzeka ngolimi lwesingisi.
Empeleni isinyathelo esinjalo singaba nomthelela omuhle ukuphucula izinga lokuxhumana kubantu abakhele lesi sifundazwe, iningi labo elikhuluma isizulu. Kodwa uma sesikhuluma ngomlando, umbuzo ozoqhamuka uthi, ngubani ozobhala lo mlando futhi ngokabani umlando ozoqhakanjiswa ezincwadini zesikole, ufunzwe izingane zethu?
Kunesisho sesingisi esithi, umlando ubhalwa yilabo abasuke benqobe impi ( history is written
by the victors). Kunokwesaba kwasebephawulile ngalolu daba - kufanele futhi - ukuthi inhloso yale mizamo wukuqhakambisa umlando weqembu elibusayo nabaholi balo ukuze lizizuzele amavoti nodumo lokuthi yilona lodwa elazabalazela inkululeko yakuleli.
Lokhu kuba manqika kwabanye ngalo mbono kufanele ngoba sikhuluma nje, cishe zonke izindawo ezibalulekile kuleli, imigwaqo nokunye okuningi sekuqanjwe ngamagama alabo ababedlelana NE-ANC.
Umlando ngamanye amaqembu ezombusazwe nabaholi bawo, ushaywa indiva nguhulumeni, yiqembu elibusayo nabadlelana nalo. Okunye okwenza lesi siphakamsiso singehli kahle, wukuthi sihambisana nempoqo.
Uhulumeni wobandlululo wayejwayele ukushayela abampisholo imithetho ngokufanele bakwenze, noma bangakwenzi.
Ngo1976 nje, uhulumeni wabamhlophe bodwa wanquma ukuba abampisholo bafunde ngesibhunu ngenkani.
Sesiyazi sonke ukuthi abafundi basesoweto nasezweni lonkana basithatha kanjani lesi siphakamiso.
Sinxusa ukuba unkk Motshekga asicwaningisise kahle lesi siphakamiso futhi axoxisane abuye athole nezimvo zezinhlaka nabantu abahlukene, hhayi nje kuphela labo avumelana nabo ngokwemibono.
Lolu wudaba olubucayi kakhulu, olungaba nomthelela wokudunga izwe, ngakho lufanele ukusingathwa ngesinono sekati.