Ukuqale sakudlala ukugijima obhekwe kwicomrades
UQALE ukugijima sakudlala ugerda Steyn (28) oyimfivilithi ukunqoba icomrades Marathon yanonyaka ezokuba ngesonto elizayo isukela emgungundlovu isongwe emoses Mabhida Stadium, ethekwini.
Ukubeka ithemba kwabantu baseNingizimu Afrika kugerda kulandela ukwenza kahle kwakhe nonyaka eba yingqwele yetwo Oceans Marathon ebingempelasonto yephasika, iguduza icape Town.
Lo msubathi uzalelwe efree State kanti uqede ibanga leshumi ngo-2008 wabe esedlulela e-university of Free State lapho enze khona iziqu zequantity Surveying.
Ngemuva kokuba esephothule izifundo zakhe uthole umsebenzi e-dubai ngo-2013 okungunyaka aqale ngawo ukugijima egqugquzelwa ngabangani bakhe khona belu edubai.
Eqala ezibona eshiya abangani bakhe ubone kuyithuba elihle ukuba agxile emabangeni amade, kanti kuthe ngo-2015 wangenela icomrades Marathon lapho enze isikhathi esingu-8:19 ngonyaka olandelayo ubeke isikhathi esingu-7:08 kwathi nyakenye waqopha u-6:45 engena endaweni yesine.
Ukwenza kahle kwicomrades kumenze ukuba ahoxe emsebenzini wagxila kwezokugijima ngemuva kokuba ethole ukwesekwa yikilabhu yakhe inedbank Running Club eholwa nguNick Bester.
Uthi ukuze angene kwi- elite yale kilabhu utshelwe ngubester ukuthi kufanele enze ngaphansi kwamahora amathathu kwimarathon, lokho wakwenza ngempumelelo komunye umjaho wasefrance.
Ngemuva kokuba enze lesi sikhathi ube esefonela ubester wamfaka kwielite yekilabhu njengoba ziqalile ukubonakala izithelo nyakenye engena isine kwicomrades wabuye wadla ubhedu kwitwo Oceans nonyaka.
Unobhuti ustefan ozinze phesheya nodadewabo u-estie Steyn naye ongumgijimi.
Ingxoxo kagerda NELANGA Lange- Sonto ( IL) ngempilo yakhe yangaphandle kwenkundla ihambe kanje:
IL: Awuchazele abafundi bephephandaba ukuthi ungumuntu onjani?
Gerda: Ngiwumuntu ozithobile futhi obathandayo abanye abantu. Ngiyazigqaja ngokuba ngowaseningizimu Afrika.
IL: Uyakholwa?
Gerda: Yebo, ngiyakholwa. Ngikhonza ENG Church.
IL: Usushadile?
Gerda: Kangikashadi kodwa ukhona engithembisene naye uduncan Ross oyikho konke empilweni yami kodwa kasikakabi nezingane. Ungisiza kakhulu uma ngizilungiselela ukugijima.
IL: Utshabaza nganhloboni yemoto?
Gerda: Ngihamba ngeford Fiesta.... esho ehleka.
IL: Yiluphi uhlelo lukamabonakude oluthandayo?
Gerda: Ngithanda imatrix nawo wonke ama- movie afana nayo.
IL: Yimuphi umlingisi omthandayo?
Gerda: Ngujames Bond.
IL: Usichitha kanjani isikhathi sakho uma ungekho kulo mdlalo wakho wokugijima?
Gerda: Ngisichitha ngezindlela ezahlukene. Ngihlala endlini noma ngibuke ama-movie kokunye ngihlale noduncan isoka lami.
IL: Ukhona omunye umdlalo owuthandayo ngaphandle kokugijima?
Gerda: Miningi imidlalo engiyenzayo, ngidlala amabhayisikile, imountain Biking, ihiking netrial Running.
IL: Uthanda umbala onjani?
Gerda: Oluhlaza sasibhakabhaka.
IL: Yikuphi ukudla okuthandayo? Gerda: Yi- steak, singishaya ngaphakathi.
IL: Yini oyenzayo uma uvuka ekuseni?
Gerda: Ngiqala ngenkomishi yekhofi ngaphambi kokuba ngenze noma yini?
IL: Kuthiwa ikhofi linecaffeine eningi kawusabi ukuthi lingakubangela inkinga ngokuhamba kwesikhathi?
Gerda: Sengaze ngalijwayela akusavumi ngihlukane nalo. IL: Yiliphi izwe olithandayo?
Gerda: Ngithanda ifrance ikakhulukazi izintaba zakhona.
IL: Uthanda hloboluni lwesilwane?
Gerda: Ngithanda inja kodwa kanginayo ngenxa yokuthi ngihlala ngihamba kodwa nginethemba lokuthi ngizokuba nayo ngelinye ilanga. Engisesabayo yisicabucabu.
IL: Ukhona ezinkundleni zokuxhumana?
Gerda: Yebo, ngikhona kufacebook (Gerda Steyn), itwitter (Gerdarun) nakwi-instagram (Gerda.steyn).
IL: Yini ozimisele ngayo kwicomrades Marathon yanonyaka?
Gerda: Kangifuni ukuzifaka ingcindezi engenasidingo ngecomrades Marathon. Okubalulekile ukuba ngigijime umjaho wami ngendlela engiziqeqeshe ngayo. Kakukho engikubhekile kodwa ngingakuthokozela ukuyinqoba ngelinye ilanga.
IL: Ngemuva kwecomrades yimuphi omunye umjaho ozobamba iqhaza kuwona?
Gerda: Kunemarathon engizoyigijima kodwa ngeke ngikwazi ukuyidalula okwamanje.
IL: Abantu abaningi bakholelwa ekutheni ukuze wenze kahle kumaUltra Marathon kufanele uqale kwitrack necross Country.
Gerda: Mina kangikholelwa kulokho. Baningi abagijimi engibahloniphayo emhlabeni abenza kahle abangakaze bayenze itrack necross Country.
IL: Ukugijima kuyishintshe kanjani impilo yakho?
Gerda: Kuyishintshe kakhulu. Bengingazi ukuthi ngizogcina ngenza kahle kulo mdlalo njengoba ngiwuqale sakudlala. Ngemuva kokuba ngihlangane nobester kushintshe izinto eziningi.
Ngiphoqelekile ukuba ngishiye phansi umsebenzi wami we-quantity Surveying ebengiwenza edubai, ngabuya ngazogxila kwezokugijima.
Ngibonga kakhulu nomphakathi wakuleli ngendlela ongihalalisele ngayo ngesikhathi nginqoba itwo Oceans Marathon okuyiyona eyenze ngabona lo mdlalo ngamanye amehlo.