SEKUNGAMAGAMA ENKEHLI NGE-COMRADES MARATHON
KUHLUKANA inhloko nesixhanti namhlanje ngokuthi ngubani ozothatha isicoco somjaho wabagijimi omkhulukazi emhlabeni, icomrades Marathon.
Owakulo nyaka umjaho, okungowama-93 wabakhona, usukela emgungundlovu kanti uzosongwa emoses Mabhida Stadium, ethekwini.
Namhlanje kubhekwe ngabomvu ukuba isicoco siphinde sisale Kwazulu-natal njengoba ingqwele kuwubongumusa Mthembu futhi kunguye othwelwe ngeqoma. Kwabesifazane, abantu abaningi bathipha ugerda Steyn, oyingqwele yetwo Oceans Marathon, ukuthi uzokwazi ukukhala emuke nalesi sicoco.
Ukuhoxa kukacamille Herron, oyingqwele nocaroline Wostmann, yikhona okwenza abantu abaningi bakubeke ngembaba ukuthi usteyn uzozidlela amahlanga kulo mjaho.
Umsubathi okubukeka engase adlisele ogageni usteyn ngucharne Bosman owunqobe ngo-2016 ukubala nje abambalwa.
Lo mjaho uthathwa njengobalulekile nasemnothweni njengoba uhlomulisa kakhulu imboni yezokuvakasha esifundazweni.
Kubikwa ukuthi imboni yezokuvakasha ingase yenze inzuzo elinganiselwa ku-r700 million nonyaka ngecomrades Marathon.
Umjaho ungenelwe ngabasubathi abaphuma emazweni angaphezulu kuka-80.
Isikhulu esiphezulu esibambile kwitourism Kwazulu-natal, uphindile Makwakwa sithe sinethemba lokuthi kuzohlumula abantu abaningi abasendimeni yezokuvakasha ngalo mjaho.
Icomrades Marathon Association (CMA) ithe bangaphezulu kuka-21 000 abasubathi ababhalisele umjaho wanamuhla kanti bangu-1430 abaphuma phesheya kwezilwandle bese beba ngu-554 abaphuma e-afrika.
Unkz Makwakwa uthe: “Abezokuvakasha KwazuluNatal bayasebenzisana NECMA minyaka yonke. Impelasonto yecomrades ibalulekile esifundazweni kwazise umnotho wethu unyuka kakhulu. Abanye babagijimi beza kulo mjaho ukuzochitha amaholidi.”