Uqhuqhwe ngamakhaza wangabe esanandisa
ISILOMO somculi esingaconsi phansi kulezi zinsuku, siqhuqhwe ngamakhaza kwabhuntsha uhlelo lokuba sinandise ohlelweni lukamabonakude, ilive Amp ngolwesihlanu olwedlule.
Ulady Zamar ongomunye wabaculi abebeqokwe emcimbini wokuklomelisa abaculi wesouth African Music Awards, bekumele anandise kulolu hlelo obeluqoshwa bukhoma endaweni evulelekile esun City ngolwesihlanu nabanye abaculi abebeqokiwe kulo mcimbi owenzeke ngomgqibelo ngeledlule.
Ngokuthola KWELANGA Langesonto, ulady Zamar ngaphambi kwalolu hlelo, ufikile wenza amalungiselelo njengabanye abaculi abemenywe nabo ohlelweni. Umthombo obukhona esun City okhulume naleli phephandaba udalule ukuthi ulady Zamar ufike ngesikhathi ngaphambi kokuba kuqale uhlelo.
“Ufike walindela eceleni kwalapho lolu hlelo beluqoshelwa khona. Ngenxa yokuthi bekusemnyango futhi kumakhaza ngendlela eyisimanga, ungene wahlala kwenye yezindawo zokudlela elindele ukuthi bazombiza, kodwa uhlale saze sadlula isikhathi abehlelelwe ukunandisa ngaso,” kusho umthombo obukhona.
Lo mthombo uqhube wathi kuthe esethi uyobheka watshelwa ukuthi sesidlulile isikhathi sakhe, akusekho okusengenziwa. Kuvele ukuthi uphindele endlini yakhe esebhocobele kwazise bekuyithuba lakhe lokugcina lokuzimaketha njengoba ukuvotelwa kwengoma yonyaka bekusavulelekile ngolwesihlanu njengoba kuvalwe ngomgqibelo kusihlwa.
Umdidiyeli walolu hlelo, unhlanhla Mthimkhulu, ukuqinisekisile ukuthi lo mculi nebala ugcine enganandisanga kulolu hlelo. “Ngesikhathi sekumele angene simqalazile sangabe sisambona. Ngenxa yokuthi uhlelo besiluqopha bukhona besingekho isikhathi sokuqala phansi simthungathe kodwa siphoqeleke ukuba siqhubeke nohlelo,” kusho umthimkhulu.
Ungcebo Mdima owezokuxhumana kwinkampani ulady Zamar aqopha ngaphansi kwayo, i-universal Music, naye usiqinisekisile lesi sigameko, wacacisa ukuthi lo mculi ubenethemba lokuthi uma sekuyisikhathi sakhe uzobizwa njengoba ebegodola esalinde isikhathi sakhe.
Ulady Zamar uhlabane nendondo yebest Dance Album kowe-sama nonyaka kanti ungomunye wabaculi abebethwelwe ngeqoma. lucky.cain@ilanganews.co.za