I-SABC izokhokhela abaculi isizumbulu
Amaciko kumele avune akutshalile
BAHLEKA bodwa abaculi ababhalise ngaphansi kwenhlangano i-independent Music Performing Rights Association (IMPRA) njengoba bezothola izizumbulu abazikweletwa yinhlangano yokusakaza kuleli isouth African Broadcasting Corporation (SABC).
I-IMPRA ungayifanisa nenyunyana ebhekelela izindaba zokudlalwa komculo wababhalise ngaphansi kwayo nebilwa neSABC ukuze kukhokheleke amalungu ayo.
Le nkokhelo eyaziwa ngele-needle Time ikhokhela abaculi ngokudlalwa komculo wabo eziteshini eziyi-18 ZESABC nokudlalwa kwama- video abo kwithelevishini.
Yikho lokhu okuyenza ihluke KWISAMRO (South African Music Rights Organization) edumile ngoba yona ikhokhela bonke abasuke bethinteka engomeni kusukela kubabhali, abadlali bezinsimbi namanothi, izinkampani eziqophile nezishicilele leyo ngoma, njalo njalo. Kule ye-needle Time kawekho wonke la manishinishi, kukhokhelwa ngqo lokho oku- zwakala emoyeni. ISABC ikhokhe imali engaphezu kwezigidi ezingamashumi amabili amarandi (R22, 469, 937.26) kule mali yeNeedle Time.
Kulesi samba u-75% uya kwababhalise ngaphansi KWE-IMPRA kanti ababhalise ngaphansi KWESAMPRA (South African Performing Rights Association) basazolinda ukuthola lo-25% wabo kuze kube le nhlangano iyavumelana ngokuphelele ngendlela abazokhokhelana ngayo NESABC. Lesi sikweletu ngesaphakathi kuka-2014 no-2015 nokusho ukuthi basakweletwa enye imali yeminyaka edlule.
Umthetho uthi ISABC kumele ikhokhele lezi zinhlangano ezibhaliswe ngokusemthethweni bese kuba yizo ezizokhokhela abaculi.
Nongqongqoshe wezobuciko namasiko kuzwelonke, umnu Nathi
Mthethwa, uthembise ukuyibheka ngamehlo okhozi le ndaba ukuze kuqinisekiswe ukuthi amaciko athola okuwafanele njengoba kunjalo.
Labo abangabhalise ndawo ithi ISABC izoxoxa nalezi zinhlangano ukuthi singalungiseka kanjani isimo sabo ukuze bathole okwabo ngokushesha.
Umnu Chris Maroleng, ongene esikhundleni sikamnu Hlaudi Motsoeneng wodumo lokuba yi-chief Operations Officer, uthi amaciko kumele avune akutshalile ngokusebenza kwawo.
Uthi bazimisele ukutshala izimali ukuze kuqinisekiswe ukuthi umculo uyathuthuka eningizimu Africa.
Umnu Kaizer Kganyago nguye oqinisekise lesi samba KWILANGA Langesonto nephesenti elikhokhelwe U-IMPRA ngoLwesithathu.