Ubonga ukwesekwa yingoduso utlolane
NGAPHANDLE KWENKUNDLA:
UBONGA ukwesekwa yisinqandamathe sakhe upuleng “1010” Tlolane (27) ongumgadli wepolokwane City osefana nedlozi eliphilayo kule kilabhu eqede isendaweni enhle kwi-absa Premiership ngesizini edlule.
Utlolane uselobolile sekusele ukuba ziwushaye nesinqandamathe sakhe ulerato. Lo mdlali udabuka emogoto, ezebediela, elimpopo. Kule ndawo kuqhamuka khona ulantshene Phalane olihlikihla kwibloemfontein Celtic nohlompho Kekana ogijima kwimamelodi Sundowns, ukubala nje abambalwa.
Utlolane ufunde amabanga aphansi elehlasedi Combined Primary School, elimpopo. Uthi waphosa ithawula esikoleni kwazise wayebona ukuthi akaphiwe kakhulu kusona. Uthi uyeke isikole emabangeni aphansi ukuze abhekane nebhola kuphela.
Udlalele imandebele Happy Boys negreen Aces eneminyaka engu-12 ubudala. Udlulele kwiwinners Park FC ebigijima kwivodacom League (Second Division) ngaleso sikhathi.
Uthi ngenxa yokukhula ebholeni, uthathwe yipolokwane Academy ngo-2012 okuyiyona emvulele amathuba okuthathwa yibay United ngaphambi kokushintsha igama ibe yipolokwane
City.
Uthi into emenza afane nedlozi eliphilayo kwicity, wukuthi nguyena umdlali oseyibambe isikhathi eside kuyona, kanti nguyena osasele kubadlali abasinda ekulimaleni engozini yemoto. Ingxoxo katlolane NELANGA
Langesonto ( IL) ngempilo yakhe yaNgaphandle kwenkundla ihambe kanje:
IL: Ukhulele ekhaya elinjani?
Tlolane: Ngikhulele ekhaya eliswele kakhulu. Yingakho ngingakufisi ukubuyela empilweni ebiphilwa ekhaya. Bekunzima kakhulu njengoba ngize ngaphoqeleka ukuyeka isikole ukuze impilo ikwazi ukuqhubeka. Ngenhlanhla enkulu besikwazi ukulala sidlile.
IL: Ngabe basaphila abazali?
Tlolane: Yebo basaphila. Ngizalwa umama ngugranny, kanti ubaba ngujerry Marema. Ngicabanga ukuthi kuzoqala isizini entsha sengibiza isibongo sikababa, sakwaMarema. Zikhona nezingane zakwethu eziwu-5. Kuzona kukhona ujomo oyinkosana, usello, uthabo, uthebatso kugcine mina.
IL: Uthanda uhlobo olunjani lokudla?
Tlolane: Uphuthu nenyama ebomvu. Okuhle ngami wukuthi kangikukhethi ukudla.
IL: Usushadelwe?
Tlolane Cha, kodwa ngisezinhlelweni zokuthatha. Ngifisa ukuthatha ulerato, kanti ngenhlanhla enkulu sengiqalile ukukhokha amalobolo. Ngiyamthanda kakhulu ulerato kwazise ukwazile ukuma nami kwaze kwafika ekugcineni. Ngike ngaba sesimweni esinzima ngeqiwa yijezi. Bengibona ukuthi kuyaphela ngami ebholeni, kodwa wama nami.
IL: Usichitha kanjani isikhathi sakho uma ungekho matasa nonobhutshuzwayo?
Tlolane: Ngivakashela abangani bami noma ngihambele izinxanxathela zezitolo.
IL: Uphatha nhloboni kamakhalekhukhwini?
Tlolane: Ngisebenzisa i-iphone 7, iwuhlobo locingo olusezi- ngeni eliphezulu.
IL: Ngabe ukhona ezinkundleni zokuxhumana?
Tlolane: Yebo, kodwa ngisebenzisa ifacebook ne- twitter kuphela. I-instagram ngisanda kuphuma kuyona ngenxa yezinkinga.
IL: Iyiphi i- soapie oyikhonzile?
Tlolane: Ngithanda ukubuka iskeem Saam, iscandal nethe Queen, kanti kwithe Queen ngikhonze ubrutus (olingiswa nguthemba Ndaba).
IL: Yimuphi umbala owuthandayo?
Tlolane: Ngithanda oluhlaza sasibhakabhaka nomhlophe.
IL: Uzikhonzile izilwane?
Tlolane: Ngilikhonze kakhulu ibhubesi. Uma ngithola isikhathi ngizikhiphela esiqiwini nomndeni wami siyobona izilwane zasendle.
IL: Uyakholelwa emadlozini?
Tlolane: Kakhulu, ngikhule ekhaya kuhlatshwa izilwane. Futhi-ke kangiwuxwayi nhlobo umuthi kwazise uyingxenye yosiko.
IL: Utshabaza ngaluphi uhlobo lwemoto?
Tlolane: Ngisebenzisa imercedez Benz i-a200.
Ingiphatha kahle kakhulu emgwaqeni.
IL: Ukhonza kuliphi ibandla?
Tlolane: Ngikhonza EZCC ngaphansi kukambhishobhi ubarnabas Lekganyane epietersburg.
IL: Yimaphi amazwe ofisa ukuwavakashela?
Tlolane: Ngifisa ukuvakashela edubai noma efrance.
IL: Yiluphi uhlobo lomculo oluthandayo?
Tlolane: Yideep House ikakhulukazi udj Black Coffee (ogama lakhe langempela ngunathi Maphumulo).
IL: Uthanda ukugqoka uhlobo olunjani lwelebuli?
Tlolane: Isikhathi esiningi ngisebenzisa ilacoste ngoba ingiphatha kahle.
IL: Yisiphi isiqholo osithandayo?
Tlolane: Yijovan Musk Murray. Ingenza nginuke kahle.
IL: Yisiphi isipho osuke wasipha abazali bakho?
Tlolane: Ngibathengele umuzi abangawukweleti nhlobo. Noma ngingaphuma ekhaya anginamahloni ngoba kuningi esengibenzele khona.
IL: Yiliphi izwe ocabanga ukuthi ungafitha kulona ngendlela odlala ngayo?
Tlolane: Yisegermany ngoba ineligi okunzima ukudlala kuyona uma usuka e-afrika.
IL: Zikhona izinhlelo ophezu kwazo zokuphila uma usuyeke ukudlala ibhola?
Tlolane: Kukhona umngani wami esizama ukufukula inkampani yokudayisa izindlu naye.
IL: Uthini owakho umbono ngezigameko zokubulawa kwabantu besifazane?
Tlolane: Kuyisimo esibi kakhulu. Sinyantisa igazi, kanti kangikwazi ukusamukela. Yini ehlula abantu besilisa ukubonisana nabantu babo?
IL: Uma uzithele emlilweni omkhulu endlini yini ongayikhipha kuqala?
Tlolane: Hahaha... izingane zami nawo wonke amalungu omndeni.
IL: Ngizwa kuthiwa washayeka kakhulu ngokudlula emhlabeni kukamogau Tshehla (Tau) engozini yemoto?
Tlolane: Mhhh. Kangifisi ukuxoxa ngobuhlungu engabuzwa ngaleso sigameko.
Empeleni utshehla besisondelene kakhulu naye esefana nomfowethu kwazise wafikela kimina lapha ekilabhini.
IL: Uthini umlayezo wakho entsheni?
Tlolane: Impilo kayikaze ibe lula. Kumele iqikelele ukuthi ibhekana nokufunda kuphela.