I-GOLDEN ARROWS ICATHAMELA ISIPHEKEPHEKE SASEBOTSWANA
ILAMONTVILLE Golden Arrows icathamela isiphekepheke setownship Rollers egijima kwibotswana Premier League.
ILANGA Langesonto lithole ngemithombo yalo encikene kakhulu nabafana Bes’thende ukuthi le kilabhu kamato Madlala icuthele ukobamelo “Swere” Kebaikanye (26) ogijima eqenjini lesizwe lasebotswana ebelibambe iqhaza kwi-2018 Cosafa Cup Tournament esongwe izolo ngoMgqibelo epolokwane.
Ukebaikanye ugile izimanga kwicosafa okwenze i-arrows yamconsela amathe.
Kuthiwa lo mdlali ubukeka ezongena khaxa kwi-arrows, kwazise ushibilika ngendlela emangalisayo esiswini.
Kuthiwa makhulu amathuba okuthi abonakale edlubhe ijezi lezikamato ngesizini ezayo.
Kuthiwa izinhloli ze-arrows ezisepolokwane zichazeke kakhulu ngezikubone kulo mdlali.
Leli phephandaba lithinta uclinton Larsen ocija i-arrows ngalolu daba, uthe empeleni baningi abadlali abebebukwa yithimba lezinhloli zale kilabhu ebezinkanise epolokwane.
“Sengike ngambona. Ungumdlali omuhle kakhulu ukebaikanye.
"Unekhono elingandile kulo mdlalo. Udlala ibhola eliya phambili futhi akenqeni ukuqonda ngqo abadlali nebhola ngendlela anekhono ngayo,” kusho lo mqeqeshi ezakhe eziqede isizini edlule zikwi- top 8 okwesibili amasizini elandelana.
Uqhube wathi: “Nokho ngeke sikujahe ukulanda noma yimuphi umdlali kwazise sinabo abanekhono kwimultichoice Diski Challenge (MDC).
"Okuhle wukuthi iqembu lethu LEMDC lenza kahle. Kakumele sehlise izinhliziyo zabadlali ngokulanda nabadlali abangabadluli esinabo ekilabhini.
"Okumqoka wukuthi kumele sikwazi ukubumba ikilabhu ngendlela engeke icindezele abadlali abasakhula ezinhlakeni zeqembu.”
I-arrows izovula ngokusemthethweni ukuqala ukucijela isizini ezokwethwasa ngoMsombuluko ozayo womhla ka-18 kunhlangulana (June). Leli phephandaba lithole ukuthi i-arrows izozifudumeza ngokugijima imidlalo yobungani namazulu FC emqhudelwaneni ozokuba mhla ka-24 kwephezulu eprincess Magogo Stadium, Kwamashu.
Userame Letsoaka oke wasebenza kwi-arrows, useqome ibotswana (FA) lapho esephethe khona isikhundla sokuba ngusomaqhinga.