WETHUSWA YISIKWATI SE-BRAZIL
UTHULASIZWE “Joe” Nkosi, ongumhlaziyi ohlonishwayo kanobhutshuzwayo eningizimu Afrika, ubona izokuba yingozi icolombia emidlalweni yendebe yomhlaba eqala ngolwesine isongwe mhla ka-15 kuntulikazi (July) erussia.
Icolombia iboshelwe kwigroup H, kanti ididiyelwe nepoland, isenegal nejapan. Unkosi uthi imidlalo yakamuva yecolombia, yenza kucace ukuthi izokufaka ukushisa kulo mqhudelwano.
“Icolombia iyizwe elinganakekile kodwa elidlala kahle. Ukuba sefomini kukajames Rodriguez wereal Madrid embolekise kwibayern Munich, kwenza ngibone bezogudluza amazwe amaningi.
"Bagabe ngabadlali abahle cishe kuzona zonke izingxenye. Ngibona kuyicolombia nesenegal abanethuba lokudlulela phambili kwigroup H,” kusho unkosi onomlando omude ekuphathweni kwebhola kuleli.
Unkosi usamile ekutheni ibrazil ne-argentina, basethubeni lokufinyelela emidlalweni eyandulela owamanqamu kulo mqhudelwano ovikelwa yigermany enqobe indebe yomhlaba ihlula i-argentina ngo-1-0 ngo-2014 ebrazil.
“Ibrazil iyabonakala ukuthi ifuna ukubuyisa isithunzi sayo kulo mqhudelwano ngemuva kokuthelwa ngehlazo ngo-2014 isekhaya (idliwe yigermany ngo-71). Isikwati sabo esizoqala imidlalo, cishe saziwa ngisho yingane encane manje.
"Ngisazibuza namanje ukuthi bazobanjwa kanjani ugariel Jesus, uneymar nophilippe Coutinho phambili. Esiswini ibrazil iqine kahle, kanti nasemuva ibophele izinkunzi.
“I-argentina ngiyethemba ngenxa yokuqeqeshwa ngumlolongi ohlakaniphe kakhulu. Ujoe Sampoaoli unqobe izinkomishi ezimqoka ecija ichile. Lokhu kwenza ngilindele lukhulu kuyena. Ulionel Messi oyisilomo se- Argentina, ubefuna ukuthi azololonga ibarcelona yasespain adlala kuyona.
“Nguyena futhi umessi onxuse ukuba i-argentina iqashe lo mqeqeshi. Ngilindele ukuba amdlalele ngobuqotho nangokwethembeka. Yize ngiwabona ezokuba yinkinga la mazwe, akumele siyibukele phansi i-uruguay. Ivamise ukuhamba ibanga elide kwindebe yomhlaba. Ibophele abadlali abahle engibona bezokwazi ukuphendula amatafula.
“Ipanama ngiyibona izophelezela abazodlulela emzuliswaneni olandelayo. Akukho okutheni ngayo. Njengoba ngibuka imidlalo yobungani, kuyangicacela ukuthi ifrance izokuba yinkinga. Kumqoka ukuthi abadlali bayo bangazikhukhumezi, futhi bangazidlaleli bona.
“Ispain ayidlali kahle emidlalweni yobungani, sengiqala ukungabaza ukuthi izofinyelela kumasemi-final. Nokho-ke mhlawumbe kukhona induku abayifihle emqubeni,” kusho unkosi.