I-iron Duke iyifuna kwibucs iligi
Ithi kuyihlazo ukungazinqobi izicoco
USIHLALO we-orlando Pirates udkt Irvin “Iron Duke” Khoza udalula izimfuno zakhe ngeOrlando Pirates zangesizini ezayo.
Ipirates ibe nesizini enhle njengoba kusongwe iligi isendaweni yesibili ekubeni ngeyandulela edlule ihlulekile ukuqeda kwi- top 8. Lokhu kusho ukuthi ngesizini ezayo izokube igijima emidlalweni yecaf Champions League nemamelodi Sundowns eyizingqwele zeligi.
Engxoxweni ukhoza abe nayo naleli phephandaba, ulitshele ngezimfuno zakhe njengoba ibucs imatasa ilungiselela isizini entsha.
“Iligi isiphunyuke ngemizuzu yokugcina ngesizini esanda kuphela. Siphazanyiswe wumdlalo wecape Town City, besiza kahle kakhulu. Kodwa ukulwa kwethu kuze kube sekugcineni, sigcine silele endaweni yesibili, kunginike ithemba lokuthi kukhulu okuzayo.
“Nokho ngifuna ukukubeka kucace ukuthi ngesizini ezayo ngifuna isicoco seligi nokuthi senze kahle emidlalweni yecaf. Ikilabhu enkulu njengepirates akufanele yeqiwe ngamasizini amathathu ingayinqobile iligi.
"Nginethemba lokuthi sizokwenza lokhu ngoba nginethimba labaqeqeshi elikhaliphile futhi elisebenza ngokuzikhandla,” kusho ukhoza.
Uthi noma kanjani izinguquko zisazobonakala eqenjini lakhe.
“Ngesizini ezayo sizokube sihluke kakhulu futhi abalandeli bethu bazobhema bakholwe. Ngisebenza esithe, ngifihle induku emqubeni, kunzima kakhulu engizoqhamuka nakho. Abalandeli bethu mabalinde nje ngiyeza, phela mina ngiyindoda ongeke uyiqonde, amakhadi ami ngiwadlalela esifubeni ngibe ngibheke izimbangi zethu.
“Kukhulu okuzayo abantu abalinde nje kangifuni ukukhuluma ngezinto engingakaziqedi ngoba izimbangi zihlale zibhekile ukuthi ipirates iza nani,” kusho ukhoza.
Ibucs isiqalile ukudedela abadlali njengoba idayise abadlali ababili uriyaad Norodien othengwe yicape Town City, kwathi ubrighton Mhlongo yena wathe- ngwa yibidvest Wits. Unorodien ubebolekiswe kwiplatinum Stars ngesizini eyedlule, umhlongo yena ubekwichippa United.