Ungene nezicabha kwamampintsha unina kababes
Unina ungene nezicabha emzini kamampintsha
UWOTHA ubomvu umndeni kababes Wodumo ngesithombe esidide abaningi ngolwesihlanu, sikababes (Bongekile Simelane) nomampintsha (Mandla Maphumulo) bendawonye, esifakwe kwi-instagram, sasusa ukukhuluma.
Kukholakala ukuthi lesi sithombe esifakwe ekhasini likaBabes ngolwesihlanu ekuseni sifakwe ngumampintsha. Ukufakwa kwaso kwakhe umqondo wokuthi sebebuyelene futhi bebendawonye ngesikhathi sifakwa.
Umthombo WELANGA
Langesonto ongashayi eceleni uthi indlela othukuthele ngayo umndeni kababes, kuze kwasuka unina kababes, unkk Thokozile Simelane, waqonda ngqo emzini kamampitsha ewestville ngoLwesihlanu kusihlwa. Kuthiwa ubevutha bhe, ethi umampintsha ubulala ikusasa lengane yakhe futhi uyenza umuntu oyiphixiphixi emphakathini.
Ngokusho komthombo, indlela abedinwe ngayo unina kababes ubefuna ngisho ukuphendula umampintsha ezinkundleni zokuxhumana kodwa umndeni wa- mkhuza.
Umampintsha usolwa ngokuthi vele uyazenzela nje ku-instagram kababes ngoba wavulwa nguyena, okwenza kube nguyena futhi ongakwazi ukushintsha izinombolo eziyimfihlo (password) zokungena kuleli khasi.
Abantu bezwakalise ukudideka ngalesi sithombe, bebuzana ukuthi kanti yikuphi okuyikhonakhona. Abanye bebesola ubabes ngokuyishaya emuva, ayishaye phambili - bezitshela ukuthi isithombe sifakwe nguyena ubabes njengoba leli khasi kungelakhe.
Abanye bebesola ukuthi akusiyena ubabes ofake lesi sithombe kodwa ngumampintsha.
Okuphinde kwadida abantu futhi wukuthi nasekhasini likamampintsha kwi-instagram kufakwe isithombe sikababes endawonye nomampintsha, ngesikhathi esifanayo, kwase kufakwa uphawu lwezinhliziyo ezibomvu kuzona zombili izithombe. Yikho lokhu okwenza abanye basola ukuthi kukhona okushaya amanzi, kwanezinsolo zokuthi ngumuntu oyedwa obefaka lezi zithombe. Lithe selithambama ilanga sakhishwa ebesifakwe ekhasini likababes.