Kuyagulisa ukuthanda umuntu ongenandaba nawe
EZOTHANDO:
KUNZIMA ukuthanda umuntu kodwa ungazi ukuthi uzomtshela kanjani. Kanti kunzima kakhulu ukuthanda umuntu ongenandaba nawe noma ongakubuki ngalelo so lokuthanda.
Ngesinye isikhathi kusuke kungekhona ukumthanda ngempela kodwa kusuke kuyinkanuko nje yokufisa ukuba naye, mhlawumbe engaphela ngokushesha uma kwenzeka livela ithuba lokuba naye.
Cishe wonke umuntu uke wazithola esesimeni sokuthanda umuntu noma sokuba nomuzwa ojulile wokufisa ukuba nomuntu othile ( crush). Yinto ejwayelekile lena futhi efikela noma ngubani. Nokho ukuba ne- crush kuye kuthatheke sengathi yinto yabantu abasebancane kodwa eqinisweni yinto ehlasela ngisho umuntu omdala.
Lesi yisimo esibuhlungu, esigcina sesimgulisa omunye umuntu. Uma kwenzeka ngesinye isikhathi kungumuntu enixhumanayo naye lo osuke unomuzwa ngaye - okungenzeka ukuba nihlanganiswe wumsebenzi noma nje nihlangane esikoleni, uzithola ngisho kukhala ucingo ugxuma uhlala uzitshela ukuthi nguye okushayelayo.
Kuthi lapho uthola ukuthi ushwebile, akuyena uphoxeke, ujabhe voco - ngesinye isikhathi uze ube nenhliziyo encane.
Kuyahlekisa-ke ukuba ne- crush kumuntu othile ngoba kuze kube sengathi uyahlanya, uzithole ukhu- luma wedwa, uthinteke emanonini uze uhleke.
Ngesikhathi usaqala ukukuhlasela lo muzwa uyawuthokozela, kube mnandi kodwa ngokuhamba kwesikhathi, kakhulukazi uma ungayitholi le nto osuke uyilangazelela, kushintsha izinto. Lo muzwa oqale umnandi ugcina usukuhlukumeza, mhlawumbe ugcine ukuphathisa ngengcindezi.
Umuntu uze azace, angakwazi nokudla azaciswe wukuthanda noma wukuhalela umuntu.
UNGADLULA KANJANI KULESI SIMO?
Abantu abaningi uma behlaselwe yi- crush baye bazitshele ukuthi basothandweni. Kuthiwa kusuke kungelona neze uthando le nto osuke uyizwa futhi kusuke kungeke kube wuthando ngisho kungathiwa seniqala okuthile nalowo muntu.
Kuthiwa uma une- crush kumuntu, usuke nje uthathekile, kungekho lutho futhi olungale kwalokho. Ukuba ne- crush kusho ukuthi kunento ethile ekuchazayo ngomuntu - kungaba wubuhle, wukuma komzimba, amehlo, njalo njalo...
Zikhona-ke izindlela ongazizama ukuze ukwazi ukudlula kulesi simo.
1. BHEKA OKUTHILE ONGAKUTHANDI
Ingqondo inhle ngoba ibamba lokhu oyitshela khona. Zama ukucinga izinto ongazithandi ngalowo muntu, bese uzitshela ukuthi akulona nje uhlobo lomuntu oludinga eduze kwakho - emuva kwalokho inhliziyo yakho izophuma kuye.
2. XOXA NABANGANI BAKHO NGE-CRUSH YAKHO
Ayikho-ke into edlula kalula uma uyivalela ngaphakathi kuwe. Into engcono nesizayo wukuthi uxoxe nabangani bakho nge- crush yakho - mhlawumbe nizogcina seniyenza ihlaya, nawe ubone ukuthi uchazwa wumbhedo nje, ugcine usudlulile kuyo.
Ingozi yokuvalela ngaphakathi imizwa yakho wukuthi izokudla wedwa, igcine isikugulisa.
3. GWEMA UKUCABANGA NGE-CRUSH
Uma uchitha isikhathi esiningi ulokhu ucabanga nge- crush yakho uzokwenza isimo sakho sibe nzima, ungakwazi ukudlulisa lesi simo. Uma uhlaselwa yimicabango nge- crush yakho, zama ukuthola into ethile ezodunga umqondo wakho.
Ukugxila kulo muntu ngemicabango ngeke kukwelaphe kodwa kuzokudalela inhliziyo eqaqambayo.
4. MQONDE UKHULUME NAYE
Ukuqunga isibindi umkhulumise lo muntu kuthiwa kungakusiza ukuba welapheke. Ngesinye isikhathi ukuzidlisa satshanyana, umxoxise kungakwenza ubone ukuthi empeleni akayona le nto oyicabangayo nokufisayo.
Kungakwenza ubone ukuthi empeleni akulona uhlobo lomuntu ongafisa ukuba nalo.
5. QALA UKUTHANDA OMUNYE
Ukuze ukhohlwe yilo muntu omfisayo kuthiwa kuyasiza ukuthola omunye ozothatheka kuye. Ngesikhathi usuthole omunye okuchazayo, maningi amathuba okuba ukhohlwe yilo wasekuqaleni.
*Ulwazi lucashunwe kwilove Panky