Siyazwelana nezikhalo zezakhamizi zasogwini
Izakhamizi zalapha sezihlupheke kwanela.
SIZWELANA nezakhamizi ezihlala ngaphansi kukaMasipala ugu ngenkinga yamanzi kuleya ndawo eseningizimu yesifundazwe.
Inkinga yokwesweleka kwamanzi kakuyona into entsha kule ndawo. Esikhathini esedlule abengamele lo mkhandlu bakwazi ukucasha ngesithupha, basola isomiso ngenkinga yamanzi.
Kodwa okuya kucaca wukuthi nabo kufanele bazinuke amakhwapha ngesimo esikhona, hhayi nje izikhulu kuphela kodwa nezisebenzi jikelele zalo masipala imbala. Ukulinyazwa kwempahla yomkhandlu, kuhlanganisa lapha amapayipi amanzi nokunye, yizisebenzi ngoba zihlose ukuphoqa umasipala ukuba azikhuphulele amaholo njengoba kuthiwa kuyenzeka kule ndawo, yihlazo. Lezi zenzo zobugebengu kazamukeleki neze. Okwenzeka lapha kakwehlukile ezenzweni zomphakathi oshisa isikole sendawo ngoba ukhala ngokungalungiswa komgwaqo. Ukwephula amapayipi amanzi kufana nokuzigwaza ngowakho uqobo ngoba amanzi ayisidingo empilweni yayo yonke into ephilayo. Kuwubuwula obuphindiwe.
Uma sesibuyela kubaphathi balo mkhandlu, kuyacaca ukuthi sebehlulekile ukuwusingatha ngendlela efanele, njengoba besolwa ngokuthi bahluleka ukuqinisekisa ukuthi ingqalasizinda, kuhlanganisa lapha amapayipi amanzi nemigwaqo, ihlala isesimeni esihle.
Ukungasebenzisi imali kwibhajethi kamasipala eyabelwe ukulungisa ingqalasizinda yinkinga ebhekene nomasipala abaningi kuleli, yingakho izindawo eziningi zingekho esimeni esihle.
Inkinga ngalo Masipala ugu wukuthi impumelelo yawo incike kakhulu emnothweni wezokuvakasha njengoba ithandwa yizivakashi eziphuma kulo lonke leli.
Ukusweleka kwamanzi kuphazamisa imboni yezokuvakasha ngoba uma umvakashi engahlalanga kahle lapha ngenxa yokusweleka kwamanzi, amathuba okuba abuye ngelinye ilanga mancane, futhi uyoxoxela nabanye ngokwenzeka kuye ngesikhathi evakashele le ndawo, bese kwakheka isithombe esibi ngayo emehlweni ezivakashi. Izakhamizi zalo masipala sezihlupheke kakhulu ngaphansi komkhandlu osukhombise ukuba yizehluleki ukulawula nokulungisa isimo.
Le ndawo futhi ibaluleke kakhulu emnothweni wezokuvakasha kulesi sifundazwe ukuba ingayekelelwa nje, izinto zibe ziqhubeka zonakala.
Yingakho sinxusa uhulumeni wesifundazwe nomnyango wezomasipala kuzwelonke imbala uma kudingeka, ukuba ungenelele lapha, uthumele ithimba ukuthatha izintambo kulo masipala ukuze utakulwe ezinkingeni okuzo.
Izakhamizi zalapha sezihlupheke kwanela.