Umjekejeke uzoqwashisa ngokubulawa kwama-albino
Avundulule namakhono amasha
USEZINHLELWENI zokwenza umzungezo ngomdlalo weshashalazi okhuluma ngokulwisana nokubulawa kwabantu abanebala elimhlophe umjekejeke wodumo lomdlalo ithe Queen. Umjekejeke, ogama lakhe langempela nguSipho Manzini, uthi sekusemome ukuba aphothule amalungiselelo alo mdlalo azimisele ukuba ukhonjiswe ezindaweni zasemakhaya ezisenyakatho yekwazulu-natal.
“Lo mdlalo ngifuna ube yindlela yokuqwashisa umphakathi ngokuhlukumezeka kwabanebala elimhlophe, ukuze bavikeleke,” kusho umanzini.
Uthi ngaphandle kokuletha lo mdlalo ezindaweni ezisemakhaya, uzophinde avundulule namakhono kulezo zindawo azozihambela.
“Ngiyazi ziningi izingane ezinamakhono amangalisayo emakhaya, ngakho kubalulekile ukuba uma ikhona indlela umuntu angenza ngayo, zivulelwe amathuba.
“Ngingathanda ezindaweni esizozihambela sithole ingane eyodwa esizosebenza nayo,” kusho umanzini oseneminyaka eminingi esemkhakheni wokulingisa.
Uthi nakuba eseke walingisa emidlalweni eminingi kamabonakude, awukho awufanisa nethe Queen.
Uthi uzizwa esekhaya kulo mdlalo kanti nabakhiqizi bawo, okuwumndeni wakwaferguson, bamphethe kahle kakhulu. “Banempatho enhle futhi benza ukukhuthalele ukwenza umsebenzi wakho. Ngikhululeke emoyeni ngabo nangendlela abasiphethe ngayo njengabalingisi,” kusho yena.
Uthi uyakuthokozela futhi ukusebenza eduze nomlingisi osanda kuqokwa kowedstv Mzansi Viewers Choice Awards, uthembisile Matu, oqokwe emunxeni webest Actress.
“Ungumuntu onekhono elimangalisayo futhi okuhle ngaye wukuthi ukwazi ukukhuluma izilimi ezahlukene,” kusho yena.
Umanzini uneziqu zepublic Admin azithola enyuvesi yaseningizimu Afrika. Ukulingisa ukuqale ngemuva kokufika egoli eyozama amadlelo aluhlaza.
Uthi ngaphandle kwethe Queen umatasa nemidlalo yeshashalazi nekamabonakude engena ngaphansi kwelokshin Bioskop. Uthi usazozimemezela izinsuku nezindawo azozihambela ngomdlalo wakhe, kwazise usaxhumana nomasipala balezo zindawo.