Unene uyazifela ngosbahle Mpisane

NGAPHANDLE KWENKUNDLA

NGEKE umhlukanise noNkulunkulu umphakamiseni “Befu” Nene (26) odlala kwiroyal Eagles egijima kwinational First Division (NFD) yeziqumama zakwaMpisane, usbu noshawn. Ukukholelwa kumdali sekuholele ekutheni lo mdlali emakilabhini awadlalelayo afuqe umkhankaso wokwakha ubunye kubadlali ngesikhali sikajehova.

Unene udabuka entabamhlophe, emtshezi.

Ufunde amabanga aphansi es’fisosethu Primary, wabe esephothula umatikuletsheni ngo2009, emthonjaneni Wolwazi High.

Ubevele ezimisele ngokuqhubeka nebhola uma eseqede isikole kwazise ubenqoba imiklomelo emqoka emiqhudelwaneni yendawo.

Udlale ibhola emazingeni aphansi egijima kumvuzane FC obudlala kwisafa LFA ethekwini Region, eclermont, lapho ebehanjiswe khona ngus’fiso Thomo.

Ngemuva kokuhlala isikhathi eside kumvuzane FC uqoqe imithwalo yakhe walibangisa kwiIsland FC ebiphethwe ngudesmond Simamane ngaphambi kokubonwa yithanda Royal Zulu ebigijima kwinfd ngo-2012, isaphethwe ngupierre Delvaux.

Usuke kwithanda wadlulela kwiblackburn Rovers ngo-2014, nayo ebidlala kwinfd.

Ukudlala kahle kule kilabhu kumenze wahlabana ngenkontileka kwi-absa Premiership ethathwa yimaritzburg United kaFarouk Kadodia ngo-2017.

Akahlalanga isikhathi esitheni yamdayisela i-eagles athi uzimisele ngokuyifaka esigabeni esiphakeme ngale sizini.

Ingxoxo kanene NELANGA

Langesonto ( I/ L) ngempilo yakhe yangaphandle kwenkundla ihambe kanje:

I/ L: Ukhule ekhaya elinjani futhi bekunzima kangakanani ukujwayela impilo yasemadolobheni njengoba ukhulele emakhaya?

Nene: Kube lula kakhulu kimina kwazise bengazi ukuthi ngizokwenzani ebholeni. Okumqoka kakhulu wukwazi ukuhlukanisa impilo yobumnandi nokuzazi udingani empilweni. Yize kusaqala kube nzima kodwa ngimile okholweni ngokuqonda ukuthi konke esikwenzayo emhlabeni kuba nobuhixihixi uma kusaqala.

I/ L: Ungumuntu onjani?

Nene: Ngiyabathanda abantu kodwa kangikuthandi ukusukelwa kwazise ngiyakwazi ukuzifikela endodeni. Ngikhonze ukuncokola ikakhulukazi nabantu engisondelene nabo. Ngikukhonzile ukuhle- ka kodwa angizwani nomuntu onochuku.

I/ L: Basaphila abazali?

Nene: Yebo basaphila. Ngizalwa umabusi Buthelezi nobongani Nene. Singu-16 sesisonke ekhaya. Omdala umsizeni kuze umsawakhe (osadlula emhlabeni), kulandele u-ayanda kuze mina. Abanye abakhona ngusanele nokhetha abangamawele nolusizo onguthunjana nabanye.

I/ L: Yiliphi iqhaza elibanjwe ngabazali bakho kuwena?

Nene: Likhulu kakhulu kwazise ngisho isimo singahambi kahle bebekhona ukungigqugquzela bengikhuthaza ukulwela isibongo sasekhaya.

I/ L: Yikuphi ukudla okuthandayo?

Nene: Yidombolo nenyama yangaphakathi. Kabakhohlwa ekhaya ukungezela uma sengifonile ukuthi ngiyeza.

I/ L: Usugcagcelwe?

Nene: Cha, kodwa nginaye engiphilisana naye. Angikabi naye umntwana kwazise ngisafuna ukuzuza lukhulu ebholeni.

I/ L: Ukhonzaphi?

Nene: E-12 Apostle Church. Ngeke ungehlukanise naleli sonto. Sengikwazile ukuzuza abanye ozakwethu kule nkolo njengoba noFortune Makaringe ogijima kwiMaritzburg United eyilungu lokuqina kule nkonzo.

I/ L: Usichitha ngani isikhathi sakho sokuphumula?

Nene: Ngizidlalela ix-box kumbe siziphumulele endlini nabangani bami. Ngesinye isikhathi sihambela inxanxathela yezitolo.

I/ L: Yimuphi umbala owuthandayo?

Nene: Ngoluhlaza kwazise ungenza ngikholelwe kimina.

I/ L: Yisiphi isilwane esikuchazayo?

Nene: Yizinja kwazise ngikhule ekhaya zikhona okwenze ngizithande kakhulu.

I/ L: Yiluphi uhlobo lukamakhal ekhukhwini olusebenzisa y o?

Nene: Yi-i-phone 7 ikwenza konke yingakho ngikhona kwi-instagram, ifacebook newhattsapp.

I/ L: Yiliphi izwe ofisa ukulivakashela ukuyophumuza umqondo?

Nene: Yiseparis, efrance kwazise idume ngobuhle leyandawo kanye nezimpahla ezinhle zokugqoka.

I/ L: Isiqholo osithandayo?

Nene: Yitom Ford inuka kahle kakhulu.

I/ L: Iyiphi imoto oyithandayo ofisa ukuyigibela ngelinye ilanga?

Nene: Yigolf 7 yesimanje.

I/ L: Kuma- soapie iyiphi ojwayele ukuyibuka?

Nene: Yisibaya. Ngithanda ukubona kakhulu ufezile (Andile Mxakaza) uyidlala kahle indawo yakhe iyangichaza.

I/ L: Yini eyokuqala oyenzayo uma uvuka ekuseni?

Nene: Wukuthandaza ngaphambi kokundlula umbhede bese ngibheka imiyalezo kumakhalekhukhwini.

I/ L: Yimuphi umculo okhonze okuwulalela?

Nene: Ngumaskandi ikakhulukazi ukhuzani “Indlamlenze” Mpungose oyiciko kulo mculo wesintu ngiyazifela ngaye.

I/ L: Yimuphi usaziwayo ozifela ngaye emhlabeni jikelele?

Nene: Hahaha.. akekho omunye ngus’bahle Mpisane ngimkhonze ukufa. Inhliziyo yami ibuhlungu njengoba esanda kuvelelwa yingozi yemoto ngiyacela esizweni ukuba simkhulekise alulame ngokushesha. Ngicela simbophe ngebhande likaJehova alulame ngoba sisamdinga kuningi okusafanele ekudlulise entsheni yakuleli.

I/ L: Zikhona izinhlelo ophezu kwazo uma usuyeke ibhola?

Nene: Cha, okwamanje ngisabhekene nebhola kuphela uma isikhathi sesifikile ngizozama ukuhlela impilo.

I/ L: Uthini umlayezo wakho entsheni esakhula ikakhulukazi o eya sentaba mhlophe lapho odabuka khona?

Nene: Imfundo iyisikhali esimqoka ngisho ungaba nekhono elibabazekayo kaliyilutho ngaphandle kwayo.

UMPHAKAMISENI Nene ongumdlali weroyal Eagles edlala kwinfd. LABA ngabafowabo bakamphakamiseni Nene. UMAMA kamphakamiseni, ubusi Buthelezi.

LABA ngodadewabo bakamphakamiseni Nene.

UBABA kamphakamiseni, ubongani Nene.

NGUMPHAKAMISENI Nene edlubhe isudi yakhe.