Ukhoza udonse ngendlebe abaqeqeshi
Uthi akeneme ngemiphumela yebucs
USIHLALO we-orlando Pirates, u-irvin “Iron Duke” Khoza udonse ngendlebe ithimba labaqeqeshi ukuba liguqule izinto kwazise akeneme ngendlela isizini eqale ngayo.
Ibucs izobhekana nebloemfontein Celtic kowe-absa Premiership namuhla ngesonto ngo-15h00 efree State Stadium.
Ibucs iya kulo mdlalo nje, izinto kaziyihambeli kahle njengoba iyiqale kabi imidlalo yokuvula kwesizini.
Ize yaphuma ngisho emqhudelwaneni WEMTN8 ikhishwa yisupersport United.
Iya kulo mdlalo nje, ngolwesithathu iguqiswe ngo-1-0 yibidvest Wits kowe-absa Premiership e-orlando Stadium, esoweto.
Leli phephandaba lithole ukuthi ukhoza ubize umhlangano ophuthumayo nethimba labaqeqeshi walazisa ukuthi akeneme ngalo njengoba izinto ziqale kabi.
Kuthiwa ulidonse ngendlebe ukuba linyuse amasokisi.
“Ukhoza akeneme yindlela iqembu eliqale ngayo. Into akhala ngayo wukuthi iqembu ulithake ngabaqeqeshi nabadlali abaseqophelweni eliphezulu kodwa kuzokwenzeka kanjena.
"Emhlanganweni alibize kuwona emuva komdlalo wewits ulazisile ukuthi ucela liguqule izinto ngoba akeneme.
"Ukhoza ufuna iligi ngale sizini, iyona into ayigaqele,” kusho umthombo ongaphakathi kwibucs.
Imizamo yokuthola ukhoza ukuba aphawule ngalolu daba iphunzile njengoba ucingo lwakhe belukhala kodwa lungabanjwa.
Umilutin “Micho” Sredojevic ocija ibucs uthi amaphaphu phansi izinto uzozilungisa kungekudala.
“Siyakwazi okufunwa ngusihlalo wekilabhu. Nathi kasijabule njengoba izinto zinjena kodwa sizokwenza ngawo wonke amandla uku- lungisa isimo.
"Lo mdlalo uzoba nzima kodwa ngikholwa wukuthi yiwona okufanele sivuke ngawo.
"Iceltic iqale kahle ayikahlulwa. Yikhona lokho okuzoyenza ibe nengcindezi.
"Lo mdlalo kufanele siwunqobe kumnyama kubomvu,” kusho usredojevic.
Usteve “Mphathi” Komphela ocija iceltic uthi ayimethusi indlela ezakhe eziqale ngayo, ubevele ekulindele.
“Abantu uma beqale ngokukwehlulela lokho kuvele kukuvuse, yikho kanye lokhu okwenzeke eqenjini lami. "Abantu basho zonke izinto ngaphambi kokuba kuqale imidlalo sabamangaza.
"Kodwa-ke angifuni ukwanda ngamaningi ngoba luselude uhambo. "Asizukutatazela sibheke umdlalo ngamunye.
"Silindele umdlalo esezingeni eliphakeme kwipirates izofika siyihlomele,” kusho ukomphela.