Indida kuhlehla Amantshontsho
Kusolwa ukushoda koxhaso
KUQUBUKE indida kuhlehla ngemizuzu yokugcina umcimbi wezindondo, amantshontsho Kamaskandi.
Lo mcimbi, ohlelwa ngumlamuli Nxele ( osesithombeni), bekumele ube ngomgqibelo wesonto elizayo mhla ka 03 E-ICC, ethekwini.
Indaba yokuhlehla kwalo mcimbi isabalale ezinkundleni zokuxhumana abantu bekhuluma ngayo, ikakhulukazi abalandeli bakamasikandi.
Kuthiwa usuhlehlele umhla ka-22 kuzibandlela (December).
ILANGA Langesonto lithole emithonjeni esondelene nabahleli balo mcimbi ukuthi okwenze wahlehliswa ukuthi kukhona umnyango kahulumeni, oxhasa lo mcimbi, ongayifakanga inkece ngesikhathi ebilindelwe ngaso.
Okhulumela Amantshontsho Kamaskandi, uzazi Nxele, ekhuluma naleli phephandaba izolo ukuqinisekisile ukuthi umcimbi uhlehlile kodwa waphika ukuthi uhlehle ngenxa yokushoda koxhaso.
“Kulo nyaka sisebenza nabantu abaningi kakhulu obekudingeka sibanike isikhathi. Kwathina uqobo njengoba Amantshontsho ekhula kangaka kudinga sizinike isikhathi esanele sokuwahlela.
“Engingakusho ukuthi bonke abantu abathintekayo bazisiwe ngoguquko, kusukela kwabathenge amathikithi, bazisiwe ngohlelo lwemiyalezo kamakhalekhukhwini. Abaculi nabo sibazisile.
“Thina sisebenza nomnyango wezobuciko namasiko, usinikile imali, konke kumi ngomumo, akukho nkinga esinayo,” kusho uzazi.
Uthe abantu mabawagcine amathikithi, bayowasebenzisa ngosuku olusha oselunqunyiwe.
hlongwaj@ilanganews.co.za