Bagqemekile emculweni ngohhp
INKAKHA emculweni, uvusi Leeuw, ichaza isihlabani sehip hop esidlule emhlabeni ngolwesithathu, UHHP (Jabulani Tsambo), njengomuntu abebesondelene kakhulu naye, efana nomfowabo kwazise ibisingaphezulu kuka-20 iminyaka bazana.
Uleeuw, othi nguyena onikeze UHHP ithuba lokuqopha ngesikhathi engena emculweni, utshele ILANGA Langesonto ukuthi udabuke kakhulu ngokudlula emhlabeni kwalo mrepha.
“Bengisanda kukhuluma naye, ezwakalisa ukujabula ngomculo abezowukhipha. Uze wafuna neseluleko kimina njengoba nakuba besingasasebenzi ndawonye kodwa bengisamchushisa ezintweni ezahlukene,” kusho uleeuw ochaze UHHP njengomuntu obezithobile futhi enenhliziyo emnene.
“Ubekwazi ukunikeza abaculi abasebancane ithuba uma ebona ukuthi banekhono. Ngikhuluma nje kunabaculi abafana nokhuli Chana, Cassper Nyovest notuks Senganga abangabanye babaculi abavulele indlela,” kuchaza uleeuw ngalo mrepha obebuye abizwe ngojabba.
Ujabba emculweni ubethathwa njengenkosi yemotswako okuwu- hlobo lokurepha ngesitswana.
Uleeuw ukhumbule nesigameko sokuqala sikahhp eyonandisa ethekwini. Uthi UHHP wayethukile, esaba ukuthi abantu bakwaZulu-natal bazowamukela kanjani umculo wakhe kwazise ubecula ngesitswana.
“Bengilokhu ngimkhuthaza ukuthi makangene esiteji enze adume ngakho abantu bazomthanda. Nebala wangena waqhulula izingoma zakhe, abantu bamjabulela kwabuya nokuzethemba,” kuqhuba uleeuw.
Uveze ukuthi nguyena owanikeza UHHP inkontileka yokuqopha enkampanini ICCP 2 eyabe ingaphansi kwe-emi. Uleeuw ngaleso sikhathi ubeyisikhulu esiphezulu sale nkampani eyakhiqiza okokuqala abaculi abafana nomandoza, TK nodj Fistaz nabanye.
Ngokusho kukaleeuw, UHHP ubengumuntu onamancoko futhi ekhaliphe ngokweqile njengoba bekuzwakala nangendlela abekhuluma ngayo nangemibono yakhe ngempilo jikelele.
Njengoba kunemibiko yokuthi ubehlaselwe yingcindezi, uleeuw uthi ubengakaze amxoxele kahle ngokumkhathazayo kodwa ubeke akhale ngezinto ezahlukene ezithinta umculo nangempilo yakhe yangasese. “Ngenxa yokuhlonipha umndeni ngeke ngande ngezinye zezingxoxo ebesiba nazo kodwa ngeke ngikufihle ukuthi emculweni bekunezinto eziningi abengagculisekile ngazo kusukela kulowo odlalwa emsakazweni kuya kubahleli bemicimbi abebebuye bengamkhokheli futhi abanye bengasamqashi,” kusho uleeuw.
Uphethe ngokudlulisa amazwi enduduzo emndenini nakubo bonke abebesondelene nalo mculi.