Imingcwabo isiyehlelwe yisithunzi yaba 'ngeyokubukisa'
Abazokhalisa umndeni sekuyibona abalindela ukutatanyiswa
IBUKEKA isiphenduke inkundla yemfashini nombukiso wesitayela imingcwabo kulezi zinsuku, kusukela ezingeni le- catering, imihlobiso yetende, uhlobo lwezimoto ezithwala umndeni, yicasket nemfashini ( dress code) emiselwe usuku kunokuba kube wusuku lokuzila nesizotha.
Indaba iqala kuwona umndeni osuke ushonelwe. Sekunomkhuba wokumosa enkulu imali kwenziwa indumezulu yomngcwabo, kuqashwa amahholo emadolobheni, kuqashwa izinkampani eziphekayo, kulungiswe ibhajethi yezimbali zokuhlobisa nokunye.
Amalunga omndeni aze aye kubasiki bengqephu ayothungisa umswenko kanokusho. Abanye bagcina besele nezikweletu ngoba benze indumezulu befuna ukugqama.
Unkz Winnie Kunene, oyiFinancial Coach ekhuluma ohlelweni lukamabonakude ireal Talk, esakazwa KWISABC 3, phambilini wathi inkinga yabantu ukuthi banelukuluku lokufuna ukubonakala ukuthi basezintweni “fit in”, wathi baze basebenzise nemali abangenayo ngoba nje befuna ukugqama.
Uthe impela imingcwabo manje isiphenduke inkundla yokukhangisa ngemfashini; indawo yokukhombisa abanye ukuthi uphumelele kangakanani empilweni nokuthi ubahlonipha kangakanani abathandiweyo bakho nakuba ungabaphathanga kahle besaphila.
Konke lokhu kufaka ingcindezi nakulabo abangamile kahle bese kuthi uma beshonelwe, nabo bagcine sebengena kwezinkulu izikweletu.
AKUSEKHO UKUBAMBISANA
Phambilini into ebihamba phambili uma kushoniwe, bekuba wukubambana ngezandla kukhaliswane, kungekho lokhu kufuna ukugqama nokubukwa.
Kuqala futhi bekuye kuthi uma kushoniwe emzini othile, ubone abantu bengena bededelana behambisa izipheko futhi beyolekelela abavelelwe yisifo.
Ubufica kukhona abatatazela nomdokwe, abanye bangene nezipheko zamabhakede amakhekhe, ujeqe abanye bezokhala ngamasaka amaveji nokunye.
Lokhu bekuwethula umthwalo kulowo mndeni osuke ubhekene nesikhathi esinzima sosizi. Amadoda nawo abesondela abone lapho engalekelela khona njengomsebenzi wokuhlaba inkomo, nakweminye imisebenzi esindayo.
Ngosuku lomngcwabo abeba matasa ngokumba umgodi wethuna, amanye abe semabhodweni enyama. Nakuba kwezinye izindawo kusekhona ukubambisana, kodwa okucacayo wukuthi isimo asisafani nakuqala.
Kule mihla, umndeni osuke ushonelwe, sekuyiwona kanye othwala kakhulu umthwalo, utatamisa labo abasuke bezokhala kunokuba kududuzwe wona.
Kufikisa amahloni okwenzeka emingcwabeni yasemalokishini kulezi zinsuku. Ufica umgengana umi uyizixongololo ezimotweni ngaphandle, uziphuzela, kodwa inkonzo ibe iqhubeka etendeni.
Lo mgengana imvamisa uthola ukuthi kawuzange uze uzihluphe ngisho nokufaka isandla ukwelekelela emabhodweni.
Uma sekuyisikhathi sokuya emathuneni, kuba yiwona kuqala futhi ongena ezimotweni uye emathuneni. Nakhona ufike ume isixuku, udle ingevu, ungafaki nesandla ekugqibeni inhlabathi.
Uma kwenzekile oscuthe bafaka isandla, bahlaba kabili ifosholo baqhele babuyele ezimotweni zabo kungakaqedwa ukugqiba. Abanye ubafica sebegijimela olayini lapho kutholakala khona okuya ngasethunjini.
Uthi umndeni ubuya emathuneni bona basuke sebehleli ematafuleni sebedla, abanye bebhizi beshutha izithombe ukuze bachome ngazo ezinkundleni zokuxhumana.
Okuba buhlungu kakhulu wukuthi imvamisa baba yimbijana abasuke besemathuneni kunalabo abasuke sebemi kolayini belindele ukudla.
Ngenxa yalezi zizathu nezinye, miningi iminden, ikakhulukazi kubantu abamnyama, esala ikhandlekile emoyeni ngenxa yokungakutholi ukwesekwa ngendlela iphinde isale icwile ezikweletini.
Lolu daba ludale inkulumo mpikiswano nakufacebook lapho umelokuhle Zondi ebhale ukuthi umndeni wakhe waphenduka inhlekisa ngoba bengayifakanga i- salad kwi- menu yomngcwabo.
“Kungani sithanda ukufaka ingcindezi labo abasuke bevele besosizini? Inkomo iyodwa ibiza kusuka ku-r7 000 kanti imbuzi nje ayikho engaphansi kuka-r1 000,” kusho yena.
Yize abaningi sebewabukela phansi ama- society (okuba yinhlangano yabesifazane elekelela ngegilosa nokufaka isandla uma kunesifo), kodwa ayasiza kakhulu ngoba ngaphandle kokuthi ethula umthwalo, anciphisa nezindleko ezingenasidingo kwazise imali yokudla komngcwabo ihlanganiswa kancane kancane njalo ngenyanga.
Ngonyaka odlule, kwethulwe okokuqala ifuneral Indaba, ethekwini lapho bekudingidwa khona ngamathuba akule mboni. Abanye baba nombono othi le ngqungquthela ayigxilanga ekukhulumeni ngezinkinga ezithinta ngqo ezemingcwabo.
Umike Bhengu wabhala kufacebook ukuthi bekumele le ngqungquthela inike umphakathi amaqhinga okungavumeli ingcindezi yokufuna ukubukwa nokushiya abantu becwile ezikweletini ngemuva kwesifo.
“Bekumele kube yikhwelo lokuqwashisa abantu ukuba bangamosi imali abangenayo ukujabulisa abantu abasuke bezobukwa ngomswenko nalabo abasuke bezele ama- after tears,” kusho yena.
Uthe kancane kancane kumele sifunde isifundo kokwenziwa ngabelungu ukuthi itiye namasandwich ambalwa kwanele ukubamba umoya uma kunesifo, hhayi inqwaba yokudla okugcina sekuchithwa, kumoseke imali ngabantu abasuke bengezile ukuzokhalisana nomndeni. ayandab@ilanganews.co.za