Ushiye phakathi efundela ukuba ngummeli

U-EMILIANO Tade ongumgadli wamazulu FC odabuka e-argentina uveza ukuthi uqale eneminyaka emihlanu nje kuphela ukuzimbandakanya nonobhutshuzwayo.

Utade (30) ukhombisa ikhono selokhu efike kuleli ngasekuqaleni kwale sizini. Uzalelwe esantiago del Estero, e-argentina.

Nokho eseneminyaka engu-16 ubudala uliyekile ibhola wabhekana ngqo nemfundo egxile kwezomthetho.

Nokho akaziqedanga lezi zifundo njengoba ehanjiswe enew Zealand ngumartin Pereyra ukuyojoyina iwellington United.

Namanje usakuthanda ukuba ngummeli.

Ungene kunobhutshuzwayo emazingeni aphansi edlalela ukuzigcina eqatha.

Ukhule ezihlanganisa nokuningi njengoba ebebuye abambe iqhaza ekwakhiweni kwezindlu abuye aqhube ibhizinisi lokupheka.

Uveza ukuthi ukuza kwakhe kuleli kuke kwaba nezihibe kwazise kumele engabe kudala awajoyina Amazulu FC.

Nokho uthokoziswa wukuthi ugcine eyijoyinile le kilabhu. Uzwakalise ukuthi akalexwayi ibhola lakuleli njengoba ebesithola isikhathi sokulibuka kumabonakude.

Udlalele iwellington United ngo-2009 kuya ku-2010. Ube esejoyina iteam Wellington ngo-2010 kuya ku-2011. Sekuwumlando ukuthi ugijime nakwi-auckland City ashaye kuyona amagoli angu-50 kusuka ku-2011 kuya ku-2015 ngaphambi kokuthathwa yiclub Atletico Mitre ngo-2015 kuya ku-2018.

Izicoco aseke wazinqoba yijack Batty Memorial Trophy nechatham Cup ngo

2012. Ingxoxo katade NELANGA Langesonto ngempilo yakhe yangaphandle kweNkundla ihambe kanje:-

ILANGA Langesonto ( I/ L): Ungumuntu onjani?

Tade: Ngiyakuthanda ukuhlala nabantu.

Ngiyikhonzile impilo futhi ngiyabahlonipha abantu.

I/ L: Uyakuthokozela ukuba sethekwini?

Tade: Ngilithanda kakhulu itheku ngenxa yobuhle balo. Isikhathi esiningi ngisichitha nomichael Morton ongikhombisa zonke izindawo zetheku. Engikuthanda nakakhulu ngeTheku wulwandle lwakhona. Nabantu bakhona bangiphethe kahle kakhulu. Sibuye sihambele izinxanxathela zezitolo kwazise sisuka kude naye. Kwesinye isikhathi sibukela ama-movie. Engihlabe kakhulu umxhwele yithe Life is Beautiful yaseArgentina.

I/ L: Ngabe usuyasicoshacosha isizulu?

Tade: Sengiyazama kancane ukubhidilisha izilimi zakuleli yize zilukhuni. Ngenhlanhla enkulu abantu engichitha nabo isikhathi bayangifundisa. Yize abanye bengifundisa amagama anenhlamba. Ngesizulu sengiyakwazi ukuphimisa ukuthi

‘ngiyaphila’ nokuthi ‘ngilambile’. Ngikholwa wukuthi ekuhambeni kwesikhathi ngizokube sengimuhle kuzona.

I/ L: Usugcagcelwe?

Tade: Cha, kodwa nginaye umuntu engihlekisana naye.

I/ L: Abazali bakho basaphila?

Tade: Sengisele nobaba (ujohn) emhlabeni. Umama (ulouisa) ushone eminyakeni embalwa edlule.

I/ L: Usichitha kanjani isizungu uma ungematasa ngonobhutshuzwayo?

Tade: Ngifunda kakhulu izincwadi. Ngithanda ezikaAnthony Brandt ethi, The Runaway Species nethi How human creativity remakes the World. Ngimatasa ngiqhuba izifundo (online) lapho ngibheka khona ukuphatha kahle indalo.

I/ L: Uyakwazi ukupheka?

Tade: Ngiyalishaya ibhodwe, ukudla engikuthandayo yi-pasta ne-macaroni.

I/ L: Nibangakhi kwenu?

Tade: Nginodadewethu abathathu u-augustine, ulouisana no-anthana. Sihlala nobaba nogogo engibathanda ukufa.

I/ L: Usayikhumbula imoto yakho yokuqala?

Tade: Kangikaze ngizikhonze izimoto. Ngizithandela ukuzishibilikela ngesithuthuthu njengoba nakuleli ngizihambela ngaso.

I/ L: Uphatha nhloboni kamakhalekhukhwini? Tade: Ngisebenzisa i-iphone endala kodwa ingiphethe kahle. Kangizikhonzile izinto eziwubukhazikhazi. Kangizikhonzile izinkundla zokuxhumana. Ngizikhonzele iwhatsapp lapho ngixoxa khona nozwakwethu isikhathi esiningi.

I/ L: Yimaphi amazwe osuke wawahambela?

Tade: Yijapan, imorocco, ifrance nasegermany.

I/ L: Yini eyokuqala ovuka uyenze ekuseni?

Tade: Ngiyathandaza bese ngiphuza itiye okuyinto engiyikhonze kakhulu.

I/ L: Uma kungasha indlu ungakhiphani kuqala?

Tade: Yi-passport yami kuphela okunye noma kungasala. Phela ngeke ngakuthanda ukuzithola ngingasakwazi ukuvakashela ekhaya uku-yobona umndeni wami.

I/ L: Yini ofisa ukuziphilisa ngayo uma usuyeke ibhola?

Tade: Ngifisa ukukhululeka emoyeni, indaba yemali kayisho lutho. Kumqoka kakhulu ukuphilisana nabantu ohlala nabo.

I/ L: Iyiphi ikilabhu okhule uyithanda?

Tade: Yimanchester United yase-england.

I/ L: Yisiphi isitobha osesabayo?

Tade: Ngisaba kakhulu u Sedat Ouro Okoriko.

I/ LL: Yisiphi isilwane osikhonzile?

Tade: Yindlovu ngenxa yobuhle bayo.

I/ L: Yiluphi uhlobo lomculo olukushaya ngaphakathi?

Tade: Ngiyawuthanda kakhulu umculo kodwa kuya ngesimo engikusona ukuthi ngidinga ukulalela luphi uhlobo.

I/ L: Yiziphi izindawo ezisakuhlabe umxhwele kuleli?

Tade: Yisegateway ethekwini nokuhamba ngigudla ulwandle. Sike savakashela olundi, ngichazeke kakhulu ngaleya ndawo ngenxa yeziqiwi nokuthola umlando ngekilabhu okube yinto enhle kakhulu empilweni yami.

I/ L: Yimuphi umbala owuthandayo.

Tade: Ngithanda oluhlaza okwesibhakabhaka.

I/ L: Yisiphi isiqholo osithandayo?

Tade: Yi-aramis. Ngiyakuthanda ukunuka kahle ngaso sonke isikhathi.

I/ L: Yimuphi umehluko owubonayo kwelakuleli nakwelaseArgentina?

Tade: Abantu bakuleli bayathandana futhi bayakwazi ukwamukela abantu. Bacishe bafane nabangasekhaya, nabo banobuntu. Yingakho ngizibona ngisekhaya.

I/ L: Wake weshelwa yinto-mbi? Kangikaze ngibe kuleso simo.

I/ L: Uthini umlayezo wakho entsheni?

Tade: Kumele iqikelele ukuthi ikhuthalela imfundo ngoba ibalulekile. Kumele isebenze kanzima futhi izazi ukuthi ifunani.

Kufanele ibe neqiniso ngempilo futhi iphokophele ukufeza amaphupho ayo. Ingalokothi izihlanganise nokungalungile.

U-EMILIANO Tade ongumgadli wamazulu FC odabuka e-argentina uthi ezilwaneni uzifela ngendlovu kanti akazikhonzile izimoto, ukhonze izithuthuthu njengoba nakuleli ezihambela ngaso. IZITHOMBE: GALLO IMAGES/GOOGLE/ MFANAFUTHI NDLOVU

Tade: