Impukane ibuyele kwandawo kul'vovo
Bahlanganisa i-albhamu ezophuma ngonyaka ozayo
IMPUKANE ibuyele kwandawo kumculi we-kwaito, ul’vovo Derrango, owaduma kakhulu enkampanini kazakes Bantwini, imayonie Productions.
Lo mculi ogama lakhe langempela nguthokozani Ndlovu noBantwini, sebephinde bahlangana futhi ukuzosebenza ndawonye.
Phambilini laba bobabili bake bangabona ngaso linye njengoba ul’vovo waphuma enkampanini kabantwini imayonie Productions wayozivulela eyakhe iderrango Records. Lokhu kakwehlanga kahle kubantwini okwaholela ekubeni bagcine sebeyinkukhu nempaka.
Ngemuva kweminyaka laba bahlukana futhi bengasasebenzi ndawonye, ngesonto eledlule babonakale beyibambe ndawonye belungiselela umsebenzi kal’vovo. Lokhu kuvele ekhasini lezinkundla zokuxhumana likal’vovo lapho ebetusa khona ubantwini, embonga ngokuvumbulula ikhono lakhe.
Uphinde waveza nokuthi ngaphandle kukabantwini ngabe akekho lapho ekhona manje. Lokhu kushaqise abaningi njengoba laba bobabili bese baziwa njengabantu abangadleli esitsheni esisodwa.
Ekhuluma NELANGA Langesonto ul’vovo, uvumile ukuthi bayasebenza nobantwini. Nokho ugcizelele ukuthi kayikho ingoma entsha asebeyenzile.
“Uzakes nguyena ongisizayo njengoba sengilungiselela ukudlala ngezinsimbi bukhoma, nguyena ohlelayo ukuthi izingoma kanye nezinsimbi kuzohambisana kanjani,” kusho ul’vovo. Utshele leli phephandaba ukuthi kuyimanje basezinhlelweni zokwenza i-albhamu yakhe (ul’vovo) ezophuma ekuqaleni konyaka ozayo.
“Uzakes nguyena ozokuba ngumdidiyeli we-albhamu yami ezophuma ngonyaka ozayo,” kuchaza ul’vovo. Utshele leli phephandaba ukuthi yize ezosizwa nguzakes kodwa i-albhamu yakhe izophuma emabala okuyinkampani aqopha ngaphansi kwayo.