EZEMISAKAZO
KUBUKEKA sengathi usekude ukuphela umbango nomdonsiswano ngohlelo usigiya Ngengoma, kwisikhondlakhondla somsakazo ukhozi FM.
Kuyimanje lolu hlelo lushayelwa nguzimiphi “Zimdollar” Biyela nomdonso Ngcobo (ZIMDONSO) okuyongena emlandweni ukuthi luke lwabanjwa yizintokazi kuphela njengoba lo mculo waziwa kakhulu ngamashinga ezinsizwa.
Sekuwumlando ukuthi nabebelusakaza phambilini esingabala kubona utshath’ugodo Ngobe, ungizwe nobheka basemachunwini bebeshaywa mihla namalanga kulona. Obekugqama bekuba wukusolwa ngokuchema nokuphehla ukungezwani phakathi kwabaculi obekukapakela kubalandeli.
Ngeshwa ukhozi FM luhleli luyisibuko ngoba lukhulu futhi iningi labashaya umasikandi lisebenzisa ulimi lwesizulu.
Kwehlula noma ulalele eminye imisakazo efana nomhlobo Wenene, umasikandi omningi ozowuthola nakhona yiwo lo ogqame okhozini FM. Nemisakazo yomphakathi ineyawo umthelela, kodwa ukhozi FM lufana nesidudla semercedes Benz ukuba besiqhathanisa ngokwezimoto.
Okunzima-ke wukuthi nanamuhla laba abalushayelayo bagxekwa nxa zonke lapho abalaleli bekwazi ukuphawula khona okuyisemaphephandabeni nasezinkundleni zokuxhumana.
Sengehluleke ngancama ukuthola ukuthi kanti kahle kahle abasebenza ukudidiyela umculo kulo msakazo basenza kanjani isiqiniseko sokuthi lokhu kuchema osekukhulunywe ngakho isikhathi eside kangaka, kuyaphela.
Sengehluleke ngancama futhi ukuthola ukuthi yini ehlula abadidiyeli bohlelo ukunqanda laba basakazi ukuba balokhu bebelesele ngezithinta uthando into engapheli.
Yebo yiqiniso elingadingi isayensi ukuthi abesifazane bakukhonzile ukukhuluma ngezisondelene nothando kodwa lolu hlelo kakulona nje phela olo-'slavithi', ngolwengoma ikakhulukazi yezinsizwa nevamise nokushinga noma ngabe ikhuluma ngalo uthando imbala.
Lezi zintokazi engizikhonze ngendlela eyisimanga nengikuthokozele ukunikwa kwazo ithuba, ikakhulukazi umdonso njengoba ebephuma emsakazweni womphakathi, kubukeka sengathi zisalandela emuva kakhulu uma uqhathanisa nabebelusakaza phambilini. Hheyi! Kwasiyala okwaxova ungizwe notshatha ngoba hhayi bebegijima bo! Bebeqhumisa ingoma bayiphelezele ngolwazi olunzulu nakuba bebebuye babe nenkinga yesipepe esikhulu.
Laba-ke basolwa nangokuchema nabaculi balapho beqhamuka noma bethanda khona.
Omunye nje umbhalo engiwubone kuleli sonto esiliphethayo ubukhala ngokuthi ukuze udlalwe uphindelela kumele ube ngowasenkandla, okuyikwesikamdonso, obuka noma emzimkhulu okuyizidleke zikazimdollar.
Hhayi bakwethu, kakumele abaphathi bayizibe le, idinga ukusukunyelwa, kuqiniswe amatomu kulaba basakazi. Nabo bazophelela eze uma kuyiqiniso ukuthi kabasebenzi ngokuthi umsebenzi uhlabahlose kangakani. Sukumani baphathi!
Singayithokozela kakhulu neyakho imibono ngakho konke okuthinta ezemisakazo kule email engezansi nasezinkundleni zokuxhumana okutholakala kuzo umbhali. Instagram: @zowakha Facebook: Zowakha Mbatha Twitter: @Zowakha zowakha@ ilanganews.co.za