SIHLAZIYA IZINCWADI
BONKE abantu abanothando lukanobhutshuzwayo nomlando wawo, ikakhulukazi abalandeli bamaZulu FC, bazoyithokozela incwadi ekhuluma ngempilo kacedric Thulani “Sugar Ray” Xulu.
Lena yincwadi esafakazela khona ukuvelela kwakhe nekhono elibabazekayo kulo mdlalo futhi elingasoze lalibaleka nanini kubathandi bawo, ikakhulukazi abake bazibonela ngezinsuku zakhe esadlala.
Le ncwadi ebhalwe ngobukhulu ubuciko nesineke nangolimi olucacile ngumnu Sibusiso Desmond Khumalo, akuvumi uyibeke phansi uma usuqalile ukuyifunda, njengoba kuthathe izinsuku ezimbili nje vo ukuba ngiyiqede.
Yincwadi lena engesiyona undendende njengoba inamakhasi angu-177 kepha ibhalwe ngendlela ekwenza usale unesithombe esiphelele ngomlando nobekwenzeka emdlalweni webhola lezinyawo kwabomdabu ngesikhathi sobandlululo.
Okugqame kakhulu ngale nsizwa yakwaxulu wukuthi bonke abayaziyo basho into eyodwa ngayo ukuthi ingumuntu ozithobile ngendlela eyisimanga futhi ongesona isikhulumi, njengoba nebizo layo elithi nguthulani liyakufakazela lokho.
Ngaphandle kokumumatha umlando omningi nocacile ngalo mdlali ngesikhathi sakhe, le ncwadi ibuye idlulise izeluleko ezakhayo nezisemqoka usugar Ray azibhekise kubadlali abasebancane abafisa ukuziphilisa ngawo lo mdlalo nangempilo jikelele. Kulokhu kayisali indaba yotshwala, yizidakamizwa nokubhubhudla imali.
Nokho kayibange isathintwa indaba yesifazane ngoba phela ukubhubhudla imali akugcini ngotshwala kuphela. Kasenele lapha isikhala sokukubala konke okubekwe kamtoti ngokulandelana nangobuciko ngumlobi kule ncwadi esihloko sithi "NGIBUKA NGESO LESIHLABANI".
Phakathi kokunye okungasoze kwalibaleka yindaba yokubukelwa phansi kwabadlali abaphuma Kwazulu-natal yizikhulu ezengamele unobhutshuzwayo kuleli njengoba kwabonakala kuqokwa iqembu lekhethelo labansundu elalizodlala nelabamhlophe ngo-1973. Emuva kokudonsa kanzima kwalelo qembu kwabonakala ukuthi ukushiywa kwakhe kulona kwakube yimpazamo.
Walandwa ekubo ngosuku lomdlalo engasabanga yingxenye yekhempu yaleso sikwata. Wehla endizeni wayiswa enkundleni okuyilapho angeniswa ngesiwombe sesibili.
Abasakazi ababesethulela umdlalo baphawula ukuthi udonga eqenjini labamhlophe obelukade luyinkinga emidlalweni eyandulela lowo wamanqamu, lwaqala ukubonakala ludilika nxa ibhola selibanjwe ngusugar Ray, okwaphetha ngokuba kube negoli lokuqala elangena ohlangothini lwabamhlophe, lishaywa nguye futhi usugar Ray kade ligotshwe ngumboneni “Shaka” Ngcobo.
Uma elichaza uthi lalicacile futhi lishesha ngangokuthi yayingekho indlela yokuliphika. Futhi uma umfundi eseqedile ukuyifunda usala engasenawo umbuzo wokuthi kungasizathu sini inkundla yezemidlalo yaseclermont entshonalanga yetheku yethiwe ngosugar Ray.
Lokho nokunye okuningi umfundi angazitholela yena kule ncwadi abheme akholwe. Ngemininingwane angaxhumana nabashicileli kule nombolo: 073 101 2001. bonginkosi@ilanganews.co.za UMCULI: OMEGA KHUNOU ISIHLOKO: WORSHIP IN SPIRIT & TRUTH
UHLOBO LOMCULO: GOSPEL UNYAKA: 2018 AMAPHUZU: 8/10
KUYAHANJWA kule albhamu. Imnandi yonke kusuka iqala ize iyophela. Lapha kuyacaca ukuthi u-omega uzinike isikhathi, zidlaliwe izinsimbi, izihlwele ziyahayiza njengoba kuqoshwe bukhoma elyric Theatre. Kungasha amabhodwe uma ungaphika nale albhamu. Abazalwane kakumele baphuthelwe yiyona. Iyatholakala ezitolo zomculo.