Uzobuyela emalawi eseqeqebula isizulu

NGAPHANDLE KWENKUNDLA:

AKAZELANGA ukuzosinisa amahleza eningizimu Afrika ulimbikani Mzava wasemalawi oyisitobha selamontville Golden Arrows. Lo mdlali utheleke kuleli ngo-2011 efikela kwibloemfontein Celtic.

Uqale ukudlala ibhola emazingeni aphansi eneminyaka engu-10 yobudala. Ukudlondlobala kwakhe kumdonsele iso labaqeqeshi beqembu lesizwe likaU/12 nelika-u/17 ngaphambi kokuba adlulele kwelikhulu.

Umzava ungomunye wabadlali bangaphandle abafike bashaya into ecokeme kuleli. Uhlala ekhona esikimini sabafana Bes’thende kanti nyakenye ube ngomunye wabagijime imidlalo eminingi kule kilabhu kamato Madlala. Umzava uzalwa mhla ka-12 kulwezi (November) ngo-1993. Lo mdlali uqale ukudlala kwi-escom United ngaphambi kokudlulela kwibloemfontein Celtic emdlulisele kwimpumalanga Black Aces ngaphambi kokujoyina i-arrows ngo-2016. Naseqenjini lesizwe uyinsika njengoba esedlale imidlalo engu-49 .

Uthi abadlali bakuleli babulawa ukudlala ngaphandle kokuzimisela.

Lo mdlali uthi uyakuthokozela ukuhlala ethekwini kwazise ukholwa ukuthi kuyisifiso sawo wonke umdlali ukuba kuleli dolobha.

Ufisa intsha yakuleli ukuba izimisele kukho konke ekwenzayo uma izimisele ngokuphumelela kunobhutshuzwayo.

Isifiso sakhe esikhulu wukunqoba izicoco ne-arrows akholwa wukuthi akusekude kwenzeke.

Lo mdlali odume ngelikapupa uthi kubalulekile ukuthi udlulisele ulwazi kwabancane njengoba behlala benza benozakwabo umusa Bilankulu athi uyisibonelo esihle entsheni yakuleli.

Ingxoxo kamzava NELANGA Langesonto ngempilo yakhe yangaphandle kwenkundla ihambe kanje:

ILANGA Langesonto ( I/ L):

Ungamchaza njengomuntu onjani ulimbikani?

Mzava:

Ngingumuntu okhululekile othandayo ukuhlala nabantu. Ngikhonze ukuzihlekela.

I/ L: Ukhulele ekhaya elinjani?

Mzava: Ngikhulele ekhaya elifudumele. Ngikhuliswe ngenhlonipho. Uthando engikhuliswe ngalo ngihluleka ngisho ukuluchaza.

I/ L : Likuphethe kanjani itheku ?

Mzava: Lingiphethe kahle kakhulu. Kuyisibusiso ukuhlala endaweni ephambili njengalo, sengihlale kakhulu kulona kodwa ngathi ngiyafika ngendlela okuhlale kumnandi ngayo ukuba kulona.

I/ L: Abazali bakho basaphila?

Mzava: Ubaba udlule emhlabeni ngo-2003 kodwa umama usekhona ngumary.

I/ L: Uyakwazi ukukhuluma isiZulu?

Mzava: Ngiyasizama noma ngingasikhulumi kahle kodwa ngulimi okulula ukulazi. Ngizogcina sengilwazi njengoba ngizazi nami ngoba khona esengikwazi ukukuzwa makukhulunywa.

Ngifuna ukubuyela emalawi sengisishaya.

I/ L: Ngabe usushadelwe?

Mzava: Cha, angikashadelwa kodwa nginaye umuntu engihlekisana naye engimthanda ukufa, umapaseka.

I/ L: Abantwana bona unabo ?

Mzava: Yebo, nginaye oyedwa nguchifundo.

I/ L: Uyakwazi ukupheka?

Mzava: Ngiyinkunzi makuziwa ngalapho njengoba ngihlala ngiziphekela njalo. Empeleni akukho engingakwazi ukukupheka.

I/ L: Yikuphi ukudla okukhonzile?

Mzava: Ngikhonze kakhulu ipapa ne-nyama.

I/ L: Uphatha hlobo luni lukamakhalekhukhwini?

Mzava: Yi-iphone 8.

I/ L: Mangaki amazwe osuke wawavakashela ?

Mzava: Maningi kakhulu ngeke ngikwazi ngisho ukuwabala.

I/ L: Iliphi ofisa ukulivakashela?

Mzava: Yifrance, ngiyafisa ukuyozipholela khona.

I/ L: Imuphi umbala owukhonzile?

Mzava: Ngithanda kakhulu umbala omnyama yize noma neminye ngiyithanda.

I/ L: Yimuphi umehluko kwiligi yakuleli uma uyiqhathanisa neyaseMalawi?

Mzava: Thina ngakithi asinabo abadlali abaningi abaseqophelweni eliphezulu kodwa siyazimisela siyakulwela ukunqoba. Kuleli kukhona yonke into kodwa abadlali bakhona babuye bangazinikeli ngokwanele.

I/ L: Hlobo luni lwesilwane osithandayo?

Mzava: Ngithanda ibhubesi.

I/ L: Yimuphi umdlali omkhonze kakhulu?

Mzava: Phesheya kwezilwandle ngikhonze urio Ferdinand owayeyisitobha semanchester United kanti kuleli ngikhonze umusa Bilankulu.

I/ L: Yimuphi umgadli okunikeza inkinga mawubhekene naye?

Mzava: Ngukhama Billiat naye osebenzisa isipiliyoni sakhe uma ubhekene naye ulala uzwile.

I/ L: Usichitha kanjani isikhathi sakho mawungekho matasa?

Mzava:

Ngizihlalela nabangani bami sizixoxele ngezinto eziningi ezahlukene siphinde sibonisane ngempilo.

I/ L: Yikuphi ofisa ukukwenza uma usuyeke ukudlala ibhola?

Mzava: Ukuzenzela ibhizinisi. Angifisi ukuzihlanganisa nebhola mase ngiliyekile.

I/ L: Yisiphi isifiso sakho ngeArrows?

Mzava: Ngifisa ukunqoba isicoco seligi nekilabhu nengikholwa ukuthi sekuseduze ukuba kwenzeke uma ngibheka indlela izinto ezihamba ngayo. Sesiyasondela lapho esifuna ukuba khona. Okuhle wukuthi sinabafana abancane abaningi abakulambele ukufunda kubantu asebemnkantshubomvu kunobhutshuzwayo.

I/ L: Nizimisele ngokuqeda kuphi kule sizini?

Mzava: Sizimisele ngokwenza kahle, ngeke ngikwazi ukusho ukuthi sizoqeda kuphi kodwa sizimisele ukwenza kahle.

I/ L: Yimuphi umyalezo ongawudlulisela entsheni efisa ukuhamba ezinyathelweni zakho?

Mzava: Umuntu kufanele azimisele kukho konke akwenzayo ukuze ezokwazi ukuphumelela.

Mina ngihlale ngiziqeqesha ngedwa ngisho sekuqediwe ekilabhini ukuze ngihlale ngise-simweni esihle ngaso sonke isikhathi.

ISITHOMBE NGABE: BACKPAGEPIX NAMUHLA kule ngosi ingaphandle kwenkundla sikuphathele ulimbikani Mzava ongumdlali wasemuva wegolden Arrows odabuka emalawi. UMZAVA nesinqandamathe sakhe umapaseka nengane yabo uchifundo. UMZAVA nengane yakhe uchifundo.

NALAPHA umzava unesinqandamathe sakhe umapaseka nengane yabo uchifundo.