LILOLIWE IZEMBE KUMQEQESHI WELE-PSL
LILOLIWE izembe kumqeqeshi wekilabhu egijima kwi-absa Premiership njengoba kuvela ukuthi abaphathi bakhe sebemtshelile ukuthi akenyuse amasokisi kungenjalo izinyawo zizogcwala udaka.
Icape Town City izobhekana neblack Leopards kowe-absa Premiership namuhla ngesonto ngo15h30 ecape Town Stadium.
Icity elolongwa ngubenni Mccarthy ziyihambela kahle izinto kulezi zinsuku njengoba isiqala ukuqoqa amaphuzu.
Ibhekene neblack Leopards edonsa kanzima njengoba iphikwa yimiphumela.
Iguqiswe ngo1-0 yikaizer Chiefs kowe-absa Premiership ngolwesithathu kusihlwa EFNB Stadium, esoweto.
Leli phephandaba lithole ukuthi liloliwe izembe kujoel Masutha ongumqeqeshi weleopards.
Kuthiwa abaphathi bale kilabhu kabeneme ngemiphumela yakamuva kangangoba banovalo lokuthi ikilabhu ingase ibuyele kwinational First Division.
Umasutha ebuzwa yileli phephandaba ngalezi zindaba uvumile ukuthi abaphathi bakhe abeneme ngesimo sekilabhu.
“Okokuxoshwa angifuni ukukhuluma ngakho ngoba yimpilo yethu thina baqeqeshi.
Kodwa engingakusho wukuthi abaphathi kabeneme ngemiphumela nami ngokunjalo.
Kodwa-ke siyazama ukuhlanganisa yingakho sinabadlali abanesipiliyoni abajima nekilabhu esengigculisekile ngabo ukuthi bangasisiza.
Kuzofanele sizame ngawo wonke amandla ukunqoba lo mdlalo yize kuzoba nzima,” kusho umasutha.
Umccarthy uthi ngeke nangengozi bayibukele phansi ileopards.
“Badonsa kanzima kodwa lokho akusho ukuthi kufanele sibabukele phansi.
Empeleni badlala ibhola elihle yikhona nje ukuthi imiphumela iyabaphika.
Engikuqaphele ngabo wukuthi banabadlali abanejubane futhi abangakhathali.
Kodwa umoya walapha ekapa uzobaxaka akulula neze ukudlala ngesivinini kuwona,” kusho umccarthy.